【樓市贏家】唔怕你精 唔怕你呆 最怕你唔來(徐峰)
今年新盤市場特別旺,個個月都有新盤推售,為求突圍而出,多個發展商都會出盡法寶吸引市場注意,但同時亦有不少發展商,樂於做「樓市copycat」,由廣告、銷售策略、甚至發言人的言論,一律照炒「樓神」級發展商高層,結果令其樓盤大賣。
最新加入成為「樓市copycat」的發展商,要數樓市「新丁」建灝地產,近期推售的天寰,是該公司在港第二個項目,第一個是去年發售的屯門低密度項目18逸品,當時由一家龍頭代理行做獨家代理,而項目亦只有18伙,當中單位數目少,加上有龍頭代理行獻計,全數單位火速沽清並非難事,故今次推售的天寰才是「考牌之作」。
項目今年初進行命名,當時的布景版,無論用色、設計,都似足新地一系列的樓盤,到近期賣樓,同期撞正長實推售海之戀,建灝一於「敵不動我不動,你一動我抄足」,同一日開示範單位、前後腳開價、電視廣告如出一撤,甚至長實話「廿四小時內開價」、加推單位「百分百會加價」都抄到十足。不過,項目至今推售兩輪單位,銷情都幾理想,至少好過隔離嘅龍譽。
其實「樓市copycat」又何止一個,舊年華懋推出將軍澳海翩匯,單日賣出400幾伙,對集團來說都算是威返次,歸根究底,除了是當時樓市熾熱,以及將軍澳南一帶基本上所有推出的樓盤都大受歡迎之外,亦是由於項目開售前,正是會德豐推出隔離的SAVANNAH,當時會地以折實呎價1.18萬元推出首批單位,成功大賣,「搭靚個棚」之後華懋再以折實1.12萬元推售,加上付款方法亦極為相似,成為海翩匯的原因。
而華懋方面亦大方承認,更說如果長實有「好橋」賣海之戀,集團推售同區全·城滙就「一於抄橋」,因為與其去度天下第一好橋,倒不如直接參考,既然人地用到掂嘅,咁可以食住個勢,亦都等地產代理唔洗再熟習過。
雖然長實經常被人抄橋,但實質上都有不少抄人橋的紀錄,好似舊年新地推售元朗PARK YOHO系列時,推出了King’s Key 120按揭計劃,買家可借足樓價120%按揭,事隔不足一星期,長實元朗世宙就推岀輕輕鬆鬆123,計劃內容基本上與King’s Key 120相同,只是按揭成數達123%,比新地多3%,所以話「天下文章一大抄」,你抄人時人哋都抄你,最緊要大家交到數。