雅虎香港財經 【樓市贏家】唔通連林鄭都唔鍾意華懋？（徐峰）
華懋近年彷彿大翻身，樓賣得好，又好威咁喺安達臣插咗第一支旗，赢曬龍頭發展商，但林鄭的新房策似乎特別不利華懋，先一個針對多貨尾發展商的空置稅，再嚟一個私樓地轉公屋地，睇怕依家班高層應該頭都大埋。
原本由嘉華經營咗幾十年石礦場嘅安達臣，早年交返俾政府用來起樓，當初估計可以起到近萬個單位，包括約7,500個私人住宅，同埋約1900個資助房屋單位，人口有成25,000人，成為啟德之外九龍最大規模新住宅區，本應大好前程，所以今年初賣地時有成25個發展商入標，破九龍區最多標書官地紀錄。
不過近年市民對上車同輪公屋的需求大增，娥姐為咗交功課，上星期忽然公布一系列房屋政策，雖然暫時仲未知對後市有幾大影響，不過呢，除咗一幅已經售出俾華懋的私樓地，同埋一幅舊年公布咗用作港人首置上車盤嘅地皮外，其餘所有安達臣住宅地都變成資助房屋地。
對一般市民來說，呢件事都可能係佳音，話晒嗰區都叫九龍區，起成幾千間公屋居屋的話，都係一個唔少嘅供應。
不過呢，對於華懋來講就慘喇，今年1月用咗31億幾買左第一幅安達臣官地，每呎樓面地價成萬二蚊，當時發展商話用45至50億發展，市場仲預計未來賣樓可以賣23000以上，但到咗今日，政府話你知，除咗呢個盤同半個首置上車盤嘅私樓之外，你會被幾千伙公屋居屋所包圍。
雖然筆者都唔係咩有錢人，之但係呢，我相信有錢人都總唔希望身邊團團轉的會係公屋居屋居民啦，所以將來發展商要賣樓，賣嘅錢點都要平啲，相信比較難打造成豪宅，利潤自然大減。不過話時話，起慣泥水樓嘅華懋，呢幾年成功洗底，但依家建築費咁貴，幅地又搞成咁，希望佢哋唔好將貨就價用平料啦。
=============================================
