香港股市 已收市

【樓市贏家】啟德業主要齊齊多謝新地(徐峰)

 

自從海航一年半前大舉掃入四幅啟德地後,啟德接連推售的多個新盤,售價都拾級而上。不過,在新地以天價首奪啟德地王後,可以同大家講,幾乎可以肯定,該區未來樓價將會進一步跑贏大市。

睇返過往歷史,新地好多時開盤,都可以炒起整區的樓價,較為近期的例子,就有將軍澳的日出康城。在新地推售晉海前,整個日出康城都是長實的天下,而長實在2015年推出的緻藍天,首批呎價只是9112元,之前幾期的二手屋苑呎價更平,到2017年新地推出晉海一期,首批呎價便高達12778元,即時令到頭幾期的首都、領都等身價大升,就連推售未夠三年的緻藍天SSD貨都勁升三成,打破長實旗下大部份樓盤多年來在入伙初期都要蝕讓的惡夢。及後會德豐推出的Malibu,首批呎價更要14347元,同區二手業主及發展商真是要多謝新地。

如果你覺得一次半次無乜代表性,再俾多個例子,十年八年前將軍澳本身就不是一個好值前的地區,倒數返20112,當是用建築面積計,區內大部份二手呎價都只係幾千蚊,最貴一個蔚藍灣畔頂層特色單位,呎價都只係10253元,不過,當年新地推出區內最豪的屋苑天晉,雖然全部都是大單位及特色單位,但首批平均就要12698元,最平一間呎價都要萬一元,貴過太古城等多個港島指標屋苑。及後天晉系多個樓盤推售都炒熱該區,事隔幾年,將軍澳南一帶已成為豪宅區,一個豆腐潤一房單位,閒閒地都700萬,兩房賣到接近1100萬了。

講返今次新地投得的啟德地,除了按總價計是全港最貴官地外,每呎樓面地價超過萬七銀,也創同區新高,好多人就估未來新地賣樓時呎價要3萬,但睇返過往歷史,新地胃口又點只咁細。

好似依家賣緊的海璇,最高呎價成6萬銀,市傳頂層特色單位更要10萬銀,當後面樓景細單位打個半價都要3萬,但呢幅地本身係北角邨,新地2012年投地時每呎樓面地價只係9300幾,當時市場只是估新地開啟時呎價要18000元,平過現時開盤售價一大截,咁你諗下未來新地賣啟德時,實際要幾錢?

=============================================

中小型代理行大匯集 Yahoo!搜尋器筍盤最多最齊