雅虎香港財經 【樓市贏家】如果中咗六合彩 夠錢買乜嘢樓（徐峰）
暑期金多寶噚晚開咗喇，頭獎一注獨得8000幾萬，筆者就無呢個褔份喇，唔知呢位幸運兒有無睇緊呢個專欄呢？如果中獎嘅係你，你又會打算點用呢筆錢嘅？
相信喺呢個咁難買樓嘅年代，好多人都期望中個六合彩頭獎，買返層樓唔駛再做無殼蝸牛，但其實即使你中8000幾萬，你都唔好諗買到有幾豪嘅屋。
首先，如果你期望中頭獎可以住大屋，可以買咩呢？好明顯山頂、南區、九龍塘呢啲傳統豪宅區你諗都唔好諗，就算西貢、紅磡全新屋仔都賣成億一間，中咗金多寶都要貼多幾千萬，睇嚟可以講句拜拜。
咁即係買到咩新屋啊？去到洪水橋2000、3000萬都有一間嘅，但真係好吊腳，要方便啲去返將軍澳啦，6000萬應該都買到間2000幾呎嘅，喺屋嚟講，係就係細咗少少，但過下住屋仔癮都好丫，不過就奇怪咗少少，全部屋仔都被屋企高座單位望住晒，一係就望住單車徑，咩氣氛都破壞哂（呢一刻，筆者真係好想用一個emoji去表達）。
如果唔咁大貪住屋仔，剩係想住新樓，又有乜揀先！海璇海景大單位點睇？話晒新地重頭盤，6000幾萬都有機會買到，但係就望住東廊，同埋始終都係北角區囉，如果飛的返屋企遇著上年紀嘅司機大佬，隨時要話去北角邨先知去邊。
唔知你哋有發覺，明明8000萬大奬點解筆者剩係講6000萬可以買咩？梗係啦，你估買樓剩俾樓價咩，買6000萬樓已經要俾200幾成300萬稅，裝修傢俬又係錢，仲返，搬咁大間屋，個個月管理費分分鐘萬幾兩萬，又係錢。
不過俾著係筆者，我就寧靜買幾間兩房單位收吓租，買間大少少二手樓自己住，雖然要俾辣稅，但至少個個月有啲租收，又可以當儲錢。好喇，發完夢，繼續返工啦！
=============================================
