【樓市贏家】年輕人如何能買樓而不靠父幹？（徐峰）

一邊廂大家都講樓價好貴，年青人難以上車，但另一邊廂，不時有所謂的「智者」、「專家」都教生後如何儲錢買樓，但講到尾，都係一班唔清楚年輕人苦況的專業人士教路，睇完他們的方法，筆者心入面通常都只有一句「咪又係靠父幹！」

好似近排有個財經網站，就教人如何在25歲擁有自己的小天地，個網站舉了一個例子，話一對小戀人大學畢業後，每人月薪萬三蚊，假設每人每月把人工四成儲起做買樓基金，三年後就有46萬幾，借埋按保做足九成按揭買一間新界區樓價大約300萬的蚊型舊樓，比完首期、佣金、厘印，仲有幾萬蚊剩返買傢俬。

講就好似好美滿，但實際呢？試想想，月入萬三，儲起四成，扣埋MPF得返7000蚊左右，假設你是一個居於新界區，每日乘地鐵到港島上班的人，一個月車費當你1000蚊，早、午兩餐求其去一間茶記食，一日至少80蚊，一個月就要2000幾蚊，供份有醫療、住院加埋少少儲蓄成份的保險基本大約要1000蚊，電話費連機價平均每月約500元，如果係做白領，當你一季用3000蚊買吓西裝、恤衫，即是每個月又無一千，扣埋剩返1500個大洋。

好喇，雖然話就話兩小口子一齊為買樓努力，但拍拖總唔會日日困在家中，一星期一次放假出去拍拖行街睇戲食飯是必然的，當每人每個月用多1000蚊，即是說，每人每月只餘下500元，一個月一次同事、朋友舊同學聚會剛剛用埋，條數好似剛剛好。

不過，重點是，香港實際上有幾多個學生哥讀大學是不用向政府借錢呢？當你返學時好努力搵生活費，但三年大學借落十幾萬「Grant Loan」交學費，畢業後一個月還千幾蚊，仲有，阿媽養到你廿幾歲，出來打工俾返二、三千蚊家用，當幫補下家計或者負責返自己的水電煤，亦是合情合理的事，計計下，搵得萬三蚊一個月仲點有四成可以儲呢？唯一就是「靠父幹」，當你屋企完全可以幫你交曬學費、出來打工後仍然唔使你俾家用仲可以照顧得你好好，咁你就有大有條件可以好似上述個例子咁，乖乖儲錢趕在25歲時買樓喇，仲要只是一間新界區樓價大約300萬的蚊型舊樓。