【樓市贏家】想有四厘回報?還看劏房豪宅(徐峰)
近幾年市區單位越起越細,但呎價動不動萬幾二萬,好多人都質疑咁細個單位點住人,或者有咁多錢又點解要住咁細,不過,原來這類單位,在市場上實在大有捧場客,自己唔願住咁細,用來收租仍然不愁租唔出,而且回報都幾好。
好似某位投資者旗下樓盤,清一色都是蚊型戶,最近推售一個,實用面積更只有150呎,細絕九龍區新盤,而這位投資者於2014年時推出了公司頭炮新盤,項目位於西營盤,最細面積只有177呎,而樓盤最近入伙,聽聞租務情況都唔錯。
好似一個面積177呎的中層開放式單位,就有中環上班一族用萬二蚊租咗,呎租成68蚊元,而計返業主買入價410多萬,回報都有3.4厘。咁啱筆者早排在facebook見到有位朋友去睇樓,仲租咗一個200呎多少少嘅「大單位」。筆者心諗,呢位朋友三十歲出頭,屬於單身貴族,唔係急住「二人世界」,何解要屈就自己呢,而且租金都唔平。呢位朋友就話,佢一直都與家人同住,但由於本身做公關,出入唔定時,經常三更午夜才歸家,與家人同住始終不便,加上公司位於中西區,於是把心一橫租個迷你單位住。
近期市場亦有另外一個迷你戶新盤入伙,地點無上述講的咁好,位於筲箕灣,不過,租金絕不遜色,一個211呎開放式間隔,開價萬四,最終減少少以1.35萬租出,呎租64元。業主2016年以410幾萬購入,回報接近4厘。而一個實用328呎的一房單位,月租接近兩萬,呎租61元,業主買入價唔使530萬,回報約3.8厘。
雖然上述租金回報,只係帳面數,實際仲要扣除差餉、管理費,以及收租期間單位的維修費,但以新入伙就有大約三厘回報來說,已經是不錯,同早幾年每逢有新盤入伙例必有平租,入伙初期租金回報兩厘都無的情況,已經有段距離。其實,香港地雖然唔大,但大部份人都要加班工作,加上香港經常塞車,時間就是金錢,好多人寧願俾貴租,住近公司,總好過朝朝6點幾起身返工,不過,最終都是益咗收租佬同發展商。