【樓市贏家】新盤收票戰 遠展贏新地 憑甚麼?(徐峰)
呢期三大新盤對壘,龍頭大佬新地連環推出大埔雲滙同北角海璇兩個大規模項目,而二打六遠東就發售大圍蚊型盤珀玥.睇牌頭,新地應該贏晒,有規模、有品牌效應,但奈何睇目前的收飛情況,始乎珀玥情況好似比雲滙同海璇兩個大盤好,到底咩原因盲拳可以打死老師傅呢?
睇翻呢轉推售的三大新盤,其實各有各賣點,海璇唔駛多講,雖然地皮前身係北角邨,但經新地重建後,已搖身一變成為港島東最矚目的豪宅項目,之前賣出的海景大單位,呎價最高去到六萬五,貴過唔少山頂樓,每伙動軏五、六千萬,最貴去到過億一間。
而今次推出的主要是細單位,由二百幾呎開到式到兩房都有,呎價大約三萬幾,話就話平過海景單位至少三成,好似好抵咁,但對比新世界之前賣既柏蔚山呎價都要貴成三成。重點係,今批單位全部折實都過千萬,筆者聽到之後同朋友傾計,大家到覺得,咩人會過千萬買個開放式先?我有一千萬使住開放式?對我要來收租,一千萬都有大把選擇吧?何況三萬幾蚊一呎北角樓,你估收租又收到幾錢?大家都是計數啫!賣俾大陸人?似乎又唔多夠豪,所以呢,海璇可以話係三大盤中收飛最差的一個。
咁雲滙又點睇先!講真,雖然雲滙收飛情況唔算好差,到今日為止都收到過千飛,但以新地嘅準則來說,都唔算得上係好,如果唔係都唔會星期六賣樓,收飛收到星期六朝早咁盡。
呢個盤價錢唔算太貴,而且有開放式有三房,入場費唔使500萬,呎價大約萬七蚊,點睇都應該可以接受,同埋都可以吸引到唔同客源,上車客收租客同換樓客都有貨可揀,但點解又唔收爆飛?無他嘅,嘉華個嘉熙喺正隔離,早兩個月先賣完樓,到依家賣咗600幾間,你估啲客真係識生金蛋咩,買家都要回一回氣啦,再加上雖然嘉熙已經加咗價,但如果用雲滙首批同嘉熙首批計,雲滙都仲係貴少少,都可能有少少影響。
講到珀玥,就真係得啖笑,上完樓書上埋價單,先發覺個盤所有有露台同工作平台嘅單位都計錯面積,搞到要漏夜改價單!一轉手就搞成咁,唔知有無人要負責任呢?不過講返個盤本身,雖然呎價要成兩萬幾,不過勝在單位細(係!唔知幾時開始,個單位夠細竟然係賣點!這就是香港),樓價細,420幾萬入到場,600萬以下仲有成80間,再加上近大圍市中心,近鐵路站,而將來港鐵大圍站項目起好仲有大型商場,齊睇呢兩點,個則係點同邊個起,都已經唔重要了!
=============================================