【樓市贏家】樓市跌喇,抵買未?(徐峰)
近排筆者聽得最多嘅問題,不外乎:個市係咪跌喇?買唔買得過啊?仲會唔會再跌啊?唔知大家對呢幾個問題有咩感覺或者心目中有咩答案呢?
首先,筆者會先講講個市係咪跌呢個問題。的而且確,個市真係跌緊,但如果你問得呢個問題,好明顯你係有過濾過市場上嘅消息同報導。
記得早幾個星期筆者都有講過,坊間好多報導會話,邊度邊度減咗幾多十萬啊,但問題就係,本身個業主叫個天價,獅子開完大口後,依家減幾十都仲係貴呢,所以睇個價係咪真係平,記緊要用同類型同景觀同質素嘅成交價去比較,叫價減幾多其實意義不太大。
不過又好實在,近排二手樓價真係回咗啲嘅,沙田第一城細兩房口價都由500尾回返到500頭左右啦,但站喺好多人嘅角度應該都仲係貴,未稱得上抵買囉。
但到底幾時先係最抵?呢個問題實在太過深奧喇,就等如股票場上有幾多日可以最低位入,最高位沽呢,所以咪要做止賺同止蝕囉,加上依家個樓市,外來因素太多,忽然話加辣減辣又唔定,美國忽然又唔知整啲咩搞你又唔定。
講咁耐,即係依家買唔買得過先?講真,筆者咁耐以嚟都無正面咁答過一個人,好老實,影響樓市因素太多,亦都無一個指標話你知點先為之見頂,叫你買完升咗你又唔會多謝我,但買完跌咗你又會怨我,所以通常筆者都只會答,「都抵住嘅」或者「諗真啲先」,所以誠哥都只係叫人量力而為。
又咁講,如果一千幾百萬買層樓,你只係聽某一啲人講話買就買,唔買就唔買,唔自己思考同分析,咁我就覺得你都係唔好買喇,咁同羊生羊太有乜分別。
=============================================
中小型代理行大匯集 Yahoo!搜尋器筍盤最多最齊