【樓市贏家】洗腦賣樓歌 幫到銷情幾多？（徐峰）

近期市場上最熱的新盤，當然要數荃灣的海之戀，單憑一個咁特色的樓盤名，未開賣就已成為話題所在，而發展商更邀請C All Star為樓盤唱廣告歌「一刻戀上」，仲利用同系的電器舖日播夜播，務求洗盡所有香港人個腦，至於個盤最終賣唔賣得，大家可以放長雙眼睇睇。

話時話，一個樓盤賣得好唔好，除了樓盤本身位置、質素、價錢等客觀因素，Marketing做得好唔好都是關鍵所在，而廣告歌正正就是其中一個重要因素，但實際上，一首廣告歌好聽與否，似乎首不是最重要，最重要是夠洗腦，令人一聽試可留下深刻留象，就好似「尖尖尖」同「雪雪雪」，相信好多人都還記憶猶新。

若然數歷年最「洗腦」的廣告歌，相信2014年推出的嵐山必定有份，發展商當年邀請了三線歌手王梓軒唱廣告歌「千色」，聽一位有出席發布會的代理朋友請，經過了短短半個鐘的發布會，整個腦都是「人人在今日起 人人讓閃亮色彩不斷交錯」，聽到頭都暈，不過樓盤在最終亦火速沽清。

當然，要數歷年來最Hit的廣告歌，我說是2002年、當年仍未登上天后寶座的容祖兒為泓景臺唱的「我的驕傲」，相信不會有人反對，首歌當年為容祖兒橫掃多個樂壇頒獎禮之餘，樓盤亦成功在逆市大賣。

不過，近年市場上最「騎呢」的廣告歌，非2006年推出的翔龍灣莫屬，當年發展商重金禮聘環球小姐Jennifer Hawkins做代言人，配以一首英文歌，雖然有人認為部份歌詞不雅而向廣管局投訴，但整體來說都算是優雅、高貴，但後來不知為何，發展商忽然換上廣東話歌詞，不是說廣東話唔好，但由老牌歌手薰妮以老土唱腔唱出「華燈閃閃動人夜色繽紛 餘光水影都市披滿感性 人間仙境星光閃出催燦 」，而加上當年發展商好興請一班老牌歌手在售樓處表演，當年好多行內人都覺得成件事好「娘」，不過當年樓盤都算賣得不俗，可見廣告歌好唔好聽未必同銷情有直接關係。
同大家分享下幾個經歷樓盤廣告：

容祖兒/泓景臺

王梓軒/嵐山

薰妮/翔龍灣