【樓市贏家】耗盡積蓄買樓 分分鐘破產(徐峰)
雖然本港樓價最已超出九七高價,但仍然有不少人因怕「遲買會貴」、「自住唔惟」,不措頃盡所有積蓄、甚至按埋阿媽層樓而衝入市,未來樓市到底升定跌,筆者好難百份百肯定答你,但「凡事留一手」,奉勸如果你俾完首期銀行戶口已所餘無幾,最後還是「停一停、諗一諗」。
筆者身邊不時都有朋友會問,樓市唔會唔跌、幾時買樓好,通常我都會答,「你計清楚自己條數先啦」。近排就有一位做公關的朋友,以阿媽的綠表身份、花400幾萬買了一間兩房居屋,樓價看上來好像不是太貴,而這位朋友月入相信有四萬幾,加上他老婆,相信供樓負責應該唔會好重。
當筆者同佢詳談之下,呢位朋友向銀行做八成按揭,即是要俾兩成首期,差不多近90萬,加埋代理佣金、厘印、預埋裝修,大拿拿拎咗超過100萬埋單。這位朋友後來向我大吐苦水,話自己多年來的積蓄已經「清袋」,最慘是,佢老婆原來唔知佢已經無錢剩。
雖然買樓是個人的事,人家兩公婆如何安排金錢亦唔到你我去指指點點,不過,筆者聽後都不禁嘆一口氣。點解?話說筆者呢位朋友,多年來都相當穩陣,投資都不會選擇太高風險產品,而且都有相當的積蓄,即使之前試過半年無返工,仍然衣食無休,但今次為了買樓,竟然把自己畢生積蓄都雙手奉上。
筆者上星期跟一位Auntie食飯,又被問「點睇樓市」,其實呢位Auntie九七前已手揸幾層樓,到現在仍能安居樂業,對樓市知識都有返咁上下,佢問筆者都只是開場白,最終都是想發表意見,想講俾同枱的仔女聽。
Auntie話,為甚麼個個都話買樓自住唔怕跌?啲人無見過九七咩?當樓市跌,即是成個市都跌,到時唔知有幾多人失業,如果你買樓,俾完首期後無曬錢,之後個個月供樓又儲唔到錢,你肯定你自己100%保得住份工而又唔減人工嗎?若果萬一失業,你又無積蓄頂住而斷供,到時唔係你想賣就賣,唔係俾返層樓俾銀行就算,如果變成負資產,賣完樓分分鐘都仲要破產。
未來個情況會唔會咁差,筆者不敢下定論,但無可否認的是,如果買樓買到自己一蚊都無剩,始終不是理智的做法。