雅虎香港財經 【樓市贏家】識租一定聖誕租屋（徐峰）
又到聖誕！又到聖誕！大家當然出席大大小小不同的聖誕派對，不過如果你是租樓一族，都會知道每逢聖誕到農曆年都是租務淡季，加上今年年尾會有幾個大盤入伙，隨時執到平租單位。
要數年底到農曆年前最多新盤入伙的地區，市場焦點所在的啟德，三個盤嘉匯、天寰、龍譽同期入伙，三個加埋有近2700個單位，當有兩成單位是租盤，都有500幾伙，「人踩人」的情況會唔會發生？暫時未知，因為業主未全部正式收樓，目前市場上的租盤都只係預租，下個月中全部收到樓後相信會見真章。
不過在未有大量租盤出現前，市場已有個別租務個案，已收到的嘉匯，一個實用面積793呎的三房單位，成交月租2.8萬，實用呎租35元。而未收樓的龍譽亦有預租，實用面積349呎的一房單位，月租1.46萬元，實用呎租42元。
對比其他舊式屋苑租金，其實這幾個盤租金都相對幾抵租，好似龍譽346呎租1.46萬，但沙田第一城一個300呎唔夠的兩房都要租大約萬三蚊，一個新樓一個30幾40年樓，一個九龍市中心一個點方便但都係新界區，大家識點揀，不過話說回來，啟德雖然係九龍市中心，不過整個區域還是發展中，根本未成型，連最值錢的沙中線都未啟用，所以先會有咁平，但如果你是新樓控，其實個價錢都幾抵住。
咁如果想租，這三個盤又點揀？筆者個人一向都係名牌控，乜都唔睇先睇品牌，三個盤，一個嘉華，一個保利，一個建灝，筆者一家揀嘉華發展的嘉匯，雖然嘉華的質素未算係最超班，但在三個發展商之中好似已經係最有信心，加上嘉華好多時在間隔設計上都好貼地，例如單位細細都預設好衣櫃位等等，但可惜嘉匯正正夾了左另外兩個盤中間，另一邊係啟德一號，景觀相當有限。
不過如果你銀両有限又想住啟德，就要揀龍譽或者天寰了，因為暫時啟德只係呢兩個入伙盤設有開放式單位，聽講有部份業主開價1.15萬至1.2萬元，實際幾錢租就睇你口才，不過面積就得230呎左右。
=============================================
