【樓市贏家】買唔到樓 全因太懶!(徐峰)
依家個個後生仔都話樓價貴上唔到車,見到人可以靠父幹上車就勁葡萄,但其實當中有好多上唔到車的後生仔,都係衰懶惰才會遲遲買唔到樓。
筆者所講的衰懶惰,並不是講唔夠勤力讀書,揾唔到份好工,或者唔夠勤力返工,而是唔夠勤力揾樓,錯失上車良機。
現時各大代理及發展商都會把放盤放在網上,做買家的只要上網㩒幾下,就會有大量樓盤可以睇,睇啱才約睇樓。不過,正因上網太過方便,好多人都依賴了網上揾樓,好少人會好似上一輩咁,落代理行問盤。
雖然,有時又唔係真係咁得閒落去同代理吹水,但實際上,好多時網上放盤都唔會係最新或者最抵買的單位。其實好易理解,當一間代理行收個盤返來,你覺得佢地第一件事真係放上網咁勤力嗎?
而且,有筍盤都益吓自己友或者熟客仔先啦,雖然上車客大都第一次幫襯代理行,最多都係租過樓,但有時問得幾句,傾吓閒計,個代理覺得啱傾,俾個筍盤你都不是無機會的,人夾人緣這種事好難講,但終日對住部電腦就一定唔會發生。
其實依家啲後生仔懶到一個程度,筆者都覺得幾好笑,好似之前筆者寫過一篇文章,題材都已經唔記得,但就有網友留言,話睇完篇文都無平樓賣,當時筆者心想,點解有人會覺得睇完篇文就會有筍盤買呢?我幾時變了大業主,可以有大量平單位拎出來賣俾讀者們呢?
早排又有位朋友,睇完facebook地產群組後跟筆者分享一件事,話說有人在群組內求盤,樓要實用700到20000呎舊樓或洋樓,月租萬三到兩萬五,這些要求都好正常,不過呢,佢要求業主一定要容許他全屋裝修分間做套房出租,如果係放賣,就一定要低水兩至三成。
筆者同朋友都覺得,你有你要求無問題,不過要筍到咁,係唔係真係上網問幾句就會有呢?力不到不為財啊!