雅虎香港財經 【樓市贏家】買恒地新樓九成要輸？（徐峰）
本港樓價狂升，帶挈不少業主賺取暴利，但市場上久不久都會有見到蝕讓的新聞，到底哪些物業或地區會是蝕讓黑點？原因何在？
好多人話買樓只要地點好，長遠都會賺，但筆者又唔係咁諗，好似上環的尚賢居咁，上個月就有個成交，一個337呎細單位，830萬賣出，呎價大約兩萬四，其實呎價都唔算平，不過呢，業主在2011年買入，當時成交價要837萬幾，即時話，揸足7年都仲要蝕。
而對比返同期樓價走勢，最新CCL大約177點，而當年呢？只係大約96點，即是話，過去7年樓價升了大約84%，何解個業主仲咁慘慘豬要蝕錢走？會唔會係個別業主本身有財務問題而將單位大平賣呢？
睇返該廈過往成交紀錄，入伙到依家一共有16宗二手成交，但當中只有四宗是有錢賺，賺幅最多都是12%，而其餘的12宗成交全部輸錢走人，最多帳面蝕成三成，咁講，今次蝕讓的業主都應該唔係個別事件，而是集體性蝕讓啦。
你問筆者點解，筆者就會答你，因為這個盤是「四叔」的，所以多蝕讓一點都不出奇，你睇睇大埔比華利山別墅、大圍名家匯，又或者一堆「曉」字單幢盤，就連「亞洲樓王」天匯都有過蝕讓，咁你就知發展商可能係令你蝕讓的一個重要因素。
記得筆者之前都有同大家分享過，四叔賣樓一向價錢行先，量反而其次，好多新盤賣價都是賣緊幾年後的市價，即係話，大部份情況下，如果你買入一層恒基樓，幾年內賣出你都要預輸多贏少。
另一個蝕讓黑點，其實就同發展商無關，但近幾年發售的新界豪宅，同樣蝕讓不絕，無論是新地發售的天巒，中海的歌賦嶺，同埋上面提過的比華利山別墅，甚至趙薇都有買的皇璧等等，好似天巒一幢約2000呎大屋，最新成交價3000萬有找，業主買入三年，未計使費都輸過200萬。
上面講的幾個屋苑，雖然部份在質素上的確比較差，但都有部份質素都幾好，但點解都要輸？不外乎都係地點問題，交通唔方便，附近配套少已是致命傷，所以話，地點對買樓來講是一個非常重要的考慮因素。
=============================================
