【樓市贏家】買樓唔做功課 隨時損失慘重(徐峰)
買樓係一件人生大事,無論對千辛萬苦終於上到車,或是有多次經驗的收租客或炒家,買樓始終係一項重大投資,動不動都花你一千幾百萬,就算細訂都要你十萬八萬,但偏偏時不時都會有新聞或者係你身邊親朋好友投訴被誤導而要賠上損失。
好似最近筆者在一個地產代理的群組中見到,有位王先生在群組中發帖,內容大致係對某代理作出指控(有齊代理工作的公司、分行資料,仲有埋該名代理及其女友相片)。據王先生描述,其母跟該名代理買樓,事前代理講明一定做到按揭,但最終結果係上唔到會,伯友無奈要撻訂,痛失近100萬!
睇呢位王先生個樣,斷估伯友年紀都唔輕,大拿拿無咗成百萬又真係好肉痛嘅。由於王生在post中無詳細交代發生經過,所以無人知事主本身有無樓,有無負債或者有無收入等,不過,幾乎所有留言都係話在簽約前,無可能只靠代理一面之詞就確定自己一定可以借到錢,一定要先揾錢行做評估。
講真,除了揾錢行外,網上面都有唔少資同工具可以參考,睇吓供樓入息要求如何計算,買幾錢樓要俾幾多首期同有咩條件先可以借錢,又可以上網睇吓自己信貸評級等等,如果老人家唔識,大可以揾個仔幫手睇。
雖然個代理可能真係有錢,但有些事係可以避免的。細細個阿媽教落,sales講嘢最唔可信,買衫好買電視好定係買樓都好,sales本身就係要你俾錢買嘢,所以你會買完件衫返去先覺得自己根本carry唔到,又或者搬完部電視先發覺乜自己個廳咁細。而買樓呢一樣咁緊要嘅事,就更加嚴重,撻訂賠佣故然陰功,買咗爛樓又係有排煩,買錯兇宅更唔知點算。
咁應該點?除了揾個可靠代理外,其實筆者一向好唔明點解有人會一個人去買樓,你買衫都會揾個朋友去幫吓眼啦!揾個有經驗嘅人,幫吓眼睇清楚有乜甩漏,有唔明嘅叫個朋友問多幾句,最重要的,就係多個人做證明,有時代理講嘅嘢你諗住自己清楚明白?可能係你誤解了,又或者如果個代理有心呃你,至少都有個人證。
另外,依家香港人買樓,瘋狂程度可能拍得住季尾大減價,望住一堆減價貨,加埋一堆搶購緊嘅人,明明你自己只係50/50諗緊買唔買,個見隔離個人搶,就將自己嘅購物意慾推到最高峰,結果好明顯,就係帶咗一件垃圾返屋企,同樣情況根本就會發生喺新盤售樓處,所以大部份的新盤都會有撻訂事件。
=============================================