【樓市贏家】買樓要睇餸食飯 一千萬買港島靚校網唔使諗(徐峰)
現時樓高到一個位,莫講話上車難,就連租樓都難,好多時都會聽到親戚朋友講,話啲樓幾貴幾貴,係!無錯係貴,但想買樓的人們又會否因為明知價高,而可以將貨就價呢?
新年期間筆者最忙當然係同唔同既親戚朋友拜年啦,包括出席女朋友家人團拜,當中有唔少「姨媽姑姐表哥表姐」之類,唔算太熟,只係見過幾次面的親戚,所以好多都唔知筆者做咩職業。
席間聽到有一位表哥講開,話就快又生多個小朋友,所以想買個單位一家四口住,預算大約有1000萬左右。其實有1000萬買樓,可以選擇的都唔算少,好多屋苑都可以買到一個四四正正的兩房單位,買遠少少入新界更以可買到三房單位。
不過呢,阿表哥嘅要求就一啲都唔少,要港島區、靚校網、新樓、有會所,最好就中西區啦。我明,做人有要求係好,不過,現實中有無呢樣貨先係重點,所以當時心諗,你應該都唔會買到樓,但以筆者的身份,又好似唔太方便主動出聲,好彩班親戚之中有一位在家中都有一定地位的人,本身做了十幾廿年代理,佢講樓市夠曬說服力,而佢當時只係輕輕地講了一句,「咁你剩係買到劏房」,班姨媽姑姐聽講都係得啖笑,但現實中,又真係有唔少呢類人,又要東又要西,都不理解出現市況,只係活在自己幻想之中。
其實,要買港島樓,夠一家四口住,如果你有1000萬鬆少少,都有不少二手屋苑可以揀,問題係你去唔去搵。
又好似之前有一位朋友買樓,錢唔多,大約只可以買到400幾萬上車盤,呢個價位真係要花多點心思去搵,但佢有何要求呢?唔要太靜、但又唔可以太旺,樓下有少少食肆同超市就夠,要就返返工地方,新界區都得,但唔要屯門元朗天水圍上水等等,樓齡太舊唔得!單幢樓唔要!最好大型屋苑!筆者心諗,嘩,好彩你唔係我個客,收你少少佣我有排幫你搵樓,後尾佢終於屈服,買了深井一個實用300幾呎兩房單位。所以話,有時錢唔夠時,就要降低少少要求,再等落去,你只能夠降低多多要求先買到樓。
=============================================
中小型代理行大匯集 Yahoo!搜尋器筍盤最多最齊