雅虎香港財經 【樓市贏家】逸瑆賣樓甩晒碌 發展商自己攞嚟（徐峰）
近期市場充斥著多個大大細細嘅新盤，大嘅有新地匯璽、南豐LP6，細嘅又有一號九龍道等等，呢幾個盤嘅反應都唔錯，但講到筲箕灣逸瑆，又會有幾多人記得佢呢？
雖然話依家呢個市乍暖還寒，一方面啲人仍然好想買樓，但另一方面好多人都擔心加息同貿易戰，但大部份新盤反應都唔錯，就算匯璽加價扮減價，400幾間都差唔多賣晒。
咁如果你話，大盤實多人搶㗎啦，咁一號九龍道呢，成個盤都係得100伙，今日賣80個單位都收到500幾飛，算係咁啦，之但係，麗新嘅逸瑆，直頭好似無咗影咁，收成10日飛都係得幾十飛，話晒都港島盤，搞乜搞成咁先？
嗱！港島區雖然永遠就好似高人一等咁嘅，但係呢，有啲地區就間唔時都會甩吓碌嘅，筲箕灣就係一個好例子，無論係island residence定香島，開盤時都賣得麻麻，係後期慢慢摵先賣得到。
講返逸瑆本身，位處後街，日頭可以話旺中帶靜，但其實夜晚都幾得人驚。如果同區內之前幾個盤比，雖然成個區啲樓密質質，但位處大街點都光猛啲通爽啲，有啲起得夠高嘅仲有啲開揚少少嘅景，但逸瑆呢？成幢樓最高29樓，望南向山，向北望正君悅軒，人哋都係29層高，即係話，莫講話景，咩光咩風都遮晒啦。
最最最重要係，負責賣樓班人其實做緊乜？已經係自己公關唔使俾錢公關公司搞，開示位開價一獲過跟住無記招無宣傳，雖然搵埋前大台主播嚟幫手，但除咗企出嚟有少少樣睇吓，其實到底有乜做過？太子女就唔使講啦，盤名都講錯，仲要同人講如果開高會賣唔去，你咁講仲邊有人買，有時又唔使誠實到咁嘅。同埋，一個有牙力嘅人先推得郁班代理幫你做嘢，開價都係得一、兩個大頭撐場，你都唔使旨意班細嘅會有幾落力啦，所以打卡扮撈客都無幾多人，個盤仲點會有好結果丫。
=============================================
