【樓市贏家】遇上租霸點算好？（徐峰）

或許是小時候被灌輸的知識，又或是電視中看到元秋的造型，在筆者心目中包租婆總是「惡死能登」，但係現實中，租霸才是強者，做業主的真是要好好保護自己免受傷害。

早陣子筆者聽聞一單幾誇張的笑料，事緣有一位業主，經代理把所持單位租予幾名南亞人士，兩年租約期過後，南亞人搬走，業主收到時見到間屋變到爛樓一樣，已經嬲到眼火爆，跟住收到煤氣公司寄來的帳單，呢名業主簡直晴天霹靂。

正常一戶幾個人，當你一日沖兩次涼，一日三餐都屋企煮飯，一個月千幾蚊煤氣費好未，但業主收到的煤氣單竟然要近5萬銀，俾著我人都癲，原因是這班南亞人每個月都自己報煤氣錶，每個月都報細數，不特止，仲要把單位整到成個專業廚房一樣，加多幾個爐頭，日日整飯盒賣給四圍的同鄉，到他們搬走後，煤氣公司來抄錶，兩年來的差額一次過追返，所以出現了近5萬元的煤氣費。

不幸的是，南亞人早已一走了之，追都無得追，而好彩的是，當初業主有把煤氣等等的登記人名改到租客，所以業主最終無須上身，只是煤氣公司收唔到那幾萬銀而已。

另一單就無咁好彩，話說有一個老人家，多年來都係自己住在自己的一個單位，見鄉下有個細侄女一個女人帶住個仔來香港咁可憐，就俾間房仔佢住，仲話會一直俾佢住落去，住了幾年後，早排老人家過身，阿仔就諗住賣樓啦，點知同買家簽好約後呢對母子話唔肯走，原因係老人家當初話俾佢哋住一世。

趕又趕唔走，正常來說業主可以入稟，但正常賣樓一個月就要交吉，要把件事擺上法庭，一個月又點夠時間呢，呢個時候對母子終於開價，一百萬即走，本身業主方面有想過不過撻訂，慢慢趕走對母子後再賣樓，但買家已經俾大訂，賠完訂再加埋雙邊佣金都幾十萬，又花時間，於是乎同對母女講價，最終俾咗成80萬叫佢哋走，買賣如期完成，雖然話係遺產，業主方面其實無成本，但白白被劏80萬都幾傷，所以有時做好人還做好人，白紙黑字是有必要的。

=============================================
中小型代理行大匯集 Yahoo!搜尋器筍盤最多最齊