雅虎香港財經 【樓市贏家】邊個夠我慘 風暴後變「人在野」（徐峰）
背山面海一向都係香港人或中國人尋覓理想居所的條件之一，不過，當你睇住一個「山竹」吹到成個香港變成廢墟一樣，四處爆窗、冧樹，你就會發現，有錢人都有有錢人嘅煩惱，難怪筆者喺十號風球當時聽到一句最難聽嘅說話：「咪以為背山面海好好」！
話說十號風球當日，筆者除咗留喺屋企望住，以防一有爆窗漏水之類可以即刻善後之外，都有同好幾個親戚朋友無聊傾吓電話，其中有一個住半山老牌豪宅嘅親戚就話，雖然屋企好穩陣，無好似啲人住幾十數高咁感覺到幢樓喺度搖，不過呢，屋企依山而建，廚房同細房都對住個山坡，望住個山坡就好驚山泥傾瀉，佢仲同筆者講，「你睇吓電視，近海都驚啲海水沖入屋啦」。
其實又咁講，佢個情況都已經好好，好多朋友揀樓都唔揀市區，而係揀一啲新界低密度嘅樓，好似村屋咁，貪佢環境清靜，貼近大自然，唔使返工放假都對住啲高樓大廈。不過呢，喺剛剛呢次打風，住村屋就真係大件事。
筆者有個住屯門村屋嘅朋友，十號波當日已經停電，但係到星期二晚，莫講話有返電，電燈公司就連檢查都未得閒去，幾日來無燈無電視無冷氣無熱水乜都無，簡直過住「人在野」嘅生活，只係靠朋友借出流動充電器，先至可以同外界保持通訊，或者上網同睇片。
不過話時話，唔知大家有無發現一件事，今次幾個爆玻璃嘅地方，好似日出康城，紅磡海邊幢商廈，又或者舊年天鴿襲港時何文田豪宅吹到入晒水，全部都係同一個發展商起，雖然你可以話個風咁勁度度都吹爛啦，但會唔會都關起樓質素事呢。
=============================================
