【樓市贏家】雲石水箱 共享天台 邊個發展商的神級設計?
買樓要考慮的因素有好多,地點、價錢、間隔等等,不過照筆者之前所講,口碑都係好重要,有時唔係發展商慳皮用平料,有部份發展商除賣樓程序錯漏百出,就連起樓都「蝦碌」連連。
所講的是都已經有好多年地產發展經驗,但一直都只徘徊中下游的麗展。如果大家有留意,麗展同帝國合作的藍塘傲近排收樓,多間傳媒都有上去做收樓故仔,睇完後真係笑到暈低。
第一單係講緊個廁所,一個正常的廁所,除了個廁所板要打得開外,後面個水箱都要開蓋啦,放吓潔廁劑都要啦,不過設計師就相當醒目,用雲石封實個水箱,仲要連住分隔廁所同企缸的玻璃,萬一壞水箱就要叫管理公司來修理,簡直是神級設計,凡人是無法子理解。
另一單是一個連天台單位,本身有個天台可以BBQ或者上去曬太陽欣賞海景係一件好美好事,不過呢,你個單位連天台的同時,隔離單位好自然都是連天台,但大家猜猜兩個天台中間如何分隔?答案是乜都無,只係地上有一條白線,吹漲!
不要以為只係單一樓盤的事,同由麗新發展的喜築,就俾傳媒發現了,一個原本應該係窗口的位置,忽然間變了一道牆,再睇樓書,竟然同一位置在不同時間的版本出現過實線同空心線兩個版本。
其實麗新又何只起樓騎呢吖,過往賣樓都有唔少搞笑事,其中Ocean One幾年前就因為廣告問題成為第一個俾銷監告的知名發展商。而上面提及的藍塘傲,當日開價時亦都出現過宣傳牌同價單資料唔同的情況,都唔明點解咁大開公司都可以經常出錯,更唔明的是,咁嘅口碑都仲有咁多人買佢樓嘅。
=============================================
中小型代理行大匯集 Yahoo!搜尋器筍盤最多最齊