【水能覆舟】大灣區，我信你至奇（渾水）

【水能覆舟】大灣區，我信你至奇（渾水）

在大陸發了大財的老朋友回港，「象徵式」開分公司。我問：「你其實檔野做大陸生意，成棚人、back office也在大陸，你落返黎香港托咩？」他說：「兄弟，你有所不知，香港公司係一個棚，等我sell生意可以同人講香港有exposure，搵投資者又可以估值高一點。」

所以，他十幾億估值的生意王國，在香港的分公司只有2個員工，一個係司機，負責載他媽媽去行街；另一個係秘書，負責秘書的日常事務和……非日常夜間工作。

他作為內地商人想南下起棚，我手上也有幾個項目，何嘗唔想北上起個棚去大陸開分公司，方便搵生意、搵商機、搵投資者。同一條橋，南下起棚no problem, 北上起棚麻L煩。香港真係好方便內地資金，相對自由，佢地黎香港開公司真係任開唔嬲。我都試過返內地開公司，十萬幾樣文件要搞，無公司又無戶口，搞一搞又等幾個月。因為在內地眼中，香港只比「外資」好一點，官方文件是把香港看成「境外」地區。我地還是跟足外資的管制，說好的CEPA呢？

香港在內地商人眼中，最大價值就係「香港」這個品牌，所以內地商人也懂得落黎香港起個棚。如果我地太跟內地同化，這個品牌價值能去到多遠，就難說得很了。

個人非常愛國愛港，隨時有準備入黨的覺悟，也很歡迎黨出幾萬億人民幣去統戰我，好讓我返鄉下買碗粥醫醫肚。政治有麻煩就叫香港人愛國做自己人，去內地做生意就當成外人。大佬啊，唔好再同我講乜春野大灣區啦，你解除多一點香港人去內地營商的限制先，要先讓我這班滿身銅臭的人渣嚐到甜頭，我們才會慢慢愛國，好不好？