【熱話】因為朋友一句「而家樓市到頂」 結果白等6年
如果有朋友好心同你講,而家樓市到頂,等等跌返20%先買,你會覺得,佢係老友定損友呢?10個有8個,當然會相信老友,改變自己投資決定,之不過,睇完近日一個網上分享個案,筆者對友情,開始有小小動搖。
最近有業主上網分享,自己跟一位朋友,同樣於6年前,亦即2012年睇樓,卻因為投資決定不同,6年後嘅今日,大家嘅財富已經唔同級數。
該朋友2012年賣出沙田一單位,套現唔夠一球後,本來想換樓再博,點知聽其他朋友講,話樓市到頂,要等跌20%才入市,結果買轉租,搬去大埔。
當時業主本來已有樓,陪呢位朋友睇樓,睇睇下買多一間,約900萬的單位。
結果該位朋友,等極都買唔到,6年來搬屋兩次,因為貴租,仲被逼愈搬愈遠,住入元朗。反而業主手上單位,估價已經接近1500萬,他不禁慨嘆,雖然大家供樓能力有別,但感覺對方係白等6年。
見面時,該朋友仲要同佢講返同一翻說話:「而家樓市到頂啦,等跌返20%左右先再買。」似乎講呢番說話嘅朋友,本身都恨錯難返。
有網民覺得,自住樓,點都早買早享受,仲話6年前同而家嘅樓價比,近港鐵站嘅,大部份的確升咗8成左右;有網民就嘖嘖稱奇,自言身邊都好多朋友都係,一直話:「冇理由唔跌㗎…」
雖然,唔知個案到底有幾真,但下次如果有朋友講樓市已經到頂,我會反問返佢,今時今日,你有無能力買返?
來源:香討
===============
財經精選資訊網站「中環街市」 臉書粉絲頁