香港股市 將在 1 小時 37 分鐘 開市

【熱話】有上市公司派20蚊利是?

新年例牌熱議公司到底幾多利是錢,以今年滙豐銀行派發每人500元過年前利是為標準(另外仲會有開工利是),利是市道應該唔太差。

點解咁講呢,因為滙豐只派20蚊開工利是真係街知巷聞,2015年甚至傳說派過朱古力,認真欺人太甚。(旅遊界就好好多,上年好多都100蚊)

不過每年都有打工仔上網訴苦,話自己做緊嗰間明明係上市公司,都係只得20蚊。話說今年又有上市公司員工上網話已證實得20蚊,據說是一間毫子股公司,並唔係大集團。

今時今日,20蚊真係連麥當勞嘅特價餐都買唔起,更無可能大想頭,想食早晨全餐。雖然話以前連滙豐都派20蚊,愈大間企業愈多人,出手就會愈低是常識,但今年連滙豐都咁筍,派20蚊會唔會孤寒咗啲?

打工仔就話間公司係毫子股,咁應該係8字頭?近年有邊間新上8字頭,大家不妨自己估下。

之不過老實講,上市公司從來唔等於有錢,要睇係上市呃錢公司,抑或係真上市公司,而且利是嘅嘢,又真係合約無包,就算唔俾,都無得去勞工處追討呀……

(備注:上年有調查指七成受訪市民習慣派利是每封廿元或以下,上到法庭要交報告,都好難說服法官要派100蚊呀)

部份來源:香討

===============

精選資訊網站「中環街市」  臉書粉絲頁