【異動尋寶】一注錢,揀邊隻好?(魏力)
執筆時為週二中午,聽到明日打風隨時「坐8望10」,停市機會大,推介無謂,不如談談操作。散戶炒股的最大障礙,除了是技術、知識外,最重要就是「哪有錢?」
炒股本身就是以小博大、令資本快速增值的途徑,魏力也是從幾萬元資金開始炒,對此絕對明白。的確,相比起5年前魏力開始寫欄炒股,目前要「刀仔鋸大樹」確是更為困難,皆因細價股自2015股災後元氣大傷,不少至今尚未復元。加上內地嚴打打走資,令買殼活動大減;再者港交所、證監今年加強打擊「啤殼」,更主動DQ業務規模細的公司。資金現在都跑去炒龍頭大價股,但假如閣下得十萬八萬在手,叫你買騰訊(700),就算一年升7成,資本增幅仍不算多,還有更重要問題:你是否有耐性坐足一年?
另外,本金有限亦衍生另一個問題:我同時睇好股票A及B,但錢就得一注,揀邊隻?呢個問題經常出現在小弟inbox,每天都要幫素未謀面的粉絲做「人生的決擇」,每個也是十分艱難的決定。印象特別深的是一個問題:魏Sir,你覺得舜宇(2382)定丘鈦(1478)好啲?
你話點揀呢?兩者處於不同增長階段,舜宇已晉身為行業大龍頭,講穩陣當然較丘鈦優勝,但未來增速可能會略為放緩,股價未必如過去一兩年展現爆發式增長。反觀丘鈦仍是中型股,處於高增長階段,但盈利會較波動,股價波幅大,急升急插是常見的事。如果只有一注錢,確實難以用注碼去分散風險,何況舜宇每手已逾10萬元,不是人人都負擔得來,這樣基本上只能向丘鈦埋手了。
一注錢,三心兩意,是初學炒股的戰友常見的現象,尤其買入甲股後,過咗幾日都未升,但乙股卻已開車了,如何是好?換馬還是死守,已是一個十分頭痛的問題。魏力的建議是,一注錢的話,盡量先多研究、少出手,先從企業業績埋手,揀盈利高增長股份,因為即使捱價,盈利強勁的股份,反彈力度也是最大,不至於萬劫不復。反之,齋睇圖炒吓炒吓,一來陷阱多易中伏,二來對企業不明所以,坐艇時的心理壓力更大。