【異動尋寶】一隻「醒醒地」的科技股(魏力)
9月份開始,個市由「炒市不炒股」轉為「炒股不炒市」,指數停左二萬八之前橫行消化超買,加上唔知「喪金」搞邊科,好友都唔會太進取。早幾日寫過,大戶將部份大價股take profit,再將利潤roll落去中小型股,博執多一轉,暫時仍然繼續。細股、莊股昨日開始亂舞,但個人不擅長呢類股,所以不會推介,想尋求有關建議,可以到訪其他專欄。
中型股比較啱自己口味,識玩回報一樣唔錯,昨在直播節目Yahoo Money Talk畀咗三隻大家:民生教育(1569)收dayhigh,埋單升11%;熊貓綠能(686)弱雞啲,高開低收,但唔穿1.06元會繼續持有;阜豐(546)做節目個陣仲跌緊,下午就抽上去,第一關睇6.2元,中期目標係7.4元,各位請自行睇車。
三個「醒醒地」訊號
今日介紹隻瞓咗一排、昨日開始「醒醒地」的科技股:IGG(799)。有睇開小弟寫文對呢個number應該好熟,8月底業績後亦分析咗一次業務狀況(詳看9月5日《都市日報》魏力專欄:「IGG再漲三個關鍵」),不贅。今次主要由技術角度睇呢隻股票。
股票同人一樣,由「瞓緊」到「醒哂」需要一點時間,如果察覺到佢「醒醒地」,又唔肯定佢會唔會去個廁所又瞓番,可以先落一小注,到佢堅醒哂先重鎚,咁就very good。技術角度去睇,IGG至少有三個「醒醒地」的訊號:一、8月初以來首次企穩20天線收市;二、9 RSI近一個月以來首次重上50水平;三、MACD自7月底以來第一次出現牛差距。再者,IGG調整了個半月,一直守於100天線之上,反映升浪未結束,大有空間追落後;上月底公佈業績,盤數咁靚都無炒過,不少人應已失望離場,大戶收齊貨又可以再炒過。
今個月《王國紀元》Android版將於中國內地上線,預料成為強勁的新增長動力,將是本月推升股價的催化劑。最後再講一次,IGG目前狀況係「醒醒地」,係有可能會瞓番,切忌大注,目標價到確認「醒哂」再update大家。