香港股市 已收市

【異動尋寶】三個年結前的炒作趨勢(魏力)

三個年結前的炒作趨勢

剛剛放完長假,仲有三日就年結,相信大部份戰友都諗住「出年先算喇」。但事實上,上星期holiday mood瀰漫市場、成交大縮水之際,恒指卻有四日「慢火煎魚」咁挾上去,每日100、200點咁,唔覺唔覺,恒指已經上番29500樓上,連黃金比率0.618(29410點)都升穿埋,確有條件再挑戰11月高位30199點。

不要誤會,魏力並非呼籲各位今日full gear衝番入場,但市場上有幾個trend正在出現,想update番大家,等大家放假去玩之餘,也能大致掌握最新市場狀況。

一、大陸消費股空群而上,下季隨時高處未算高。「大陸通脹唔係好勁咋喎,點解炒消費股?」炒股炒預期,大陸今年經濟好過預期,上游資源股最先炒起,之後民眾消費力逐步提升,拉高通脹預期,消費股就有運行。民以食為天,最先受惠的就係「飲飲食食」股,例如潤啤(291)、康師傅(322)、蒙牛(2319)。下一轉可留意家電股,觀圖索驥,海信科龍(921)、海爾(1169)都係唔錯的選擇。

二、「雙馬」掀起新零售戰幔, 馬雲斥224億銀入股高鑫零售(6808),馬化騰就入股永輝超市,互聯網巨頭收購線下零售商的動作相信陸續有來。第一隻受惠股自然是高鑫。11月公佈收購後,大戶於8元水平收咗一輪貨,上週五(22日)於10天線水平出現突破,短線有力上試9蚊水平。

三、另一個炒作目標為「發A股」概念,最新鮮熱辣係紅星美凱龍(1528)。上週五收市後公佈獲批發A股,股價當日已偷步炒高7.6%,收報12.5元,但其實仍低於2年前的招股價13.28元。發A股往往成為股價催化劑,皆因目前A股同業如美克家居(600337)市盈率(PE)達28.3倍;好萊客(603898)PE亦達28倍,而紅星美凱龍僅10倍,存在大幅折讓,A股掛牌有望拉高H股估值,對股價大為有利。

執筆至此,又係時候要幫個仔掃風換片,明年再見!

www.facebook.com/2012jason