雅虎香港財經 【異動尋寶】三隻手機股業績點評（魏力）
晚上11點半，終於大致睇哂業績通告，有些業績超好，但股價又升了很多，就不點評了，還是講番比較熟的手機設備股。
整體而言，手機行業舊年很差，很多年未試過，手機無新功能，換機意欲低；智能手機又趨向飽和，要買的都買了；中美貿易戰、華為糾紛，基本上，最不幸的事都發生在手機股身上。今年大家都講5G，但又是否手機股翻身之時？
先講小米，因為佢最早出業績，一眼望落，扭虧賺135億人幣，但睇開新經濟股的話，都知呢粒GAAP的數，包含好多水份，也有很多扭曲之處，基本上是不用理會。打開業績，比較像真的Non-GAAP，賺85.5億人幣，按年增長60%，還算不錯，也比預期的82億人幣好一點。
不過，睇大陸媒體報道，幾乎一面倒插佢第四季營收環比負增長，又差過預期云云。呢個當然是事實，手機、互聯網服務同樣告跌，絕對值得憂慮，但大陸媒體很少咁齊心「問候」一間公司，有戰友口痕地說：是否「穩維費」給得不足所致（笑）？
整體而言，個人認為小米業績不差，市盈率回至29倍，也已非天價，如週三股價升穿3月初高位12.68元，是一個不俗的買入訊號。
少有地搞到10點幾先出業績，不用看也知有點燶味。由於一早已發盈警，純利無大意外，按年跌14.6%，每股盈利2.2792人幣，折合2.62港元左右，現價計37倍PE。貴唔貴？如果份業績畀到增長憧憬，唔算貴（之前50幾60倍PE都照炒上），但係好可惜，搵唔到新增長點。
展望一節，舜宇只是說一些「加大研發投入、強化製造能力、控制成本、加強團隊建設」呢類「阿媽係女人」的說話，四平八穩，也就沒有想像空間。假設今年做番好些少，有兩成增長，PE仲有30倍，你覺得吸唔吸引？
呢隻就比較識sell，業績係咁講5G，又話「北美大客」會越來越多訂單，又講到「技術護城河」云云，呢啲咪有憧憬囉。不過，一望2018年份業績，唔多開胃，上半年EPS 6.91仙，全年就8.76仙，即係下半年得番1.85仙，環比大瀉7成。有「護城河」條數都大跌7成，一係證明舊年下半年個市堅差，蛇都死，抑或代表條護城河挖得唔夠深？
咁買唔買得？借「主席報告」內一句話：「我們相信5G在未來兩年逐步推出時，本集團能於5G市場佔有理想的份額。」即係話，等一兩年囉。
