【異動尋寶】丘鈦一役的自我檢討（魏力）

金仔導彈未有震散港股，A股強勢固然帶來支持，期指結算因素亦不容忽視，加上今日為內銀業績放榜的「超級星期三」，基於內銀業績復蘇的憧憬，淡友也不敢貿然大手沽，何況計埋8月在內，恒指大有可能「八連升」，追平2007年的連升紀錄，不少淡友已告陣亡，要好友轉軚，相信要等一個非常壞的消息，去動搖好友陣營的信心，9月如美聯儲啟動「縮表」，是潛在利淡因素之一。

當然，操作上暫時毋須「先天下之憂而憂」，清定貨等股災，因為9月是否啟動縮表都未知；即使啟動，亦可能因為收水步伐較市場預期慢，而被市場解讀為好消息，如今氣勢未中斷，絕對有權再推上，太早跳車，之後萬一發現「跳錯車」，想再跳上去就不容易，反而更因為成本推高了，會令震倉時更加難守。自己操作係個市一路上，可以適量減持降低成本，控制倉位風險，寧願等升勢斷纜再撤退，雖然最尾會輸哂一截出去，但也比現階段貿然跳車的勝算為高。

就借丘鈦科技（1478）的例子自我檢討一下，為何不應「先天下之憂而憂」。8月9日丘鈦公佈中期業績，靚爆鏡，比Bloomberg預期還要好，當晚在fb fanpage出分析文，給予目標價12.3元，大約就是20%左右水位。結果翌日已升凸，魏力亦跟著自己分析，於12.3元開始慢慢沽出。記得當時自己有三個憂慮：1. 驚炒高批股；2. 驚市場太亢奮，升過龍了；3. 驚手上利潤白白流走，點都食咗先講。

家陣睇番，頭兩個理由都是合理懷疑，但第三個憂慮卻是致命傷，就係驚由賺變輸，未等到丘鈦升勢斷纜就「雞咁腳」咁閃人；雖然個價越沽越高，沽到尾注已是零成本，但也無勇氣死守貨尾，14個幾就走哂，白白錯失其後兩星期的5成升幅（之後可能更多），十分可惜。

www.facebook.com/2012jason