香港股市 已收市

【異動尋寶】兩隻昔日愛股的業績點評(魏力)

業績期最後一週,每日百幾間公司派成績,結果又係睇到12點幾,先有時間動筆寫呢篇稿,唔熟嗰啲就無謂講,都係揀番兩隻「舊愛」點評一下:

一、金山軟件(3888)

2013年由幾蚊開始跟呢隻股票,2015年上過30幾蚊,家陣得17蚊,無計,近幾年條數真係差。業務都係三瓣:遊戲、辦公軟件、雲服務。遊戲繼續走下坡,皆因轉身太慢,一路靠PC game食老本,到收入開始下滑先急急搞手遊,但暫時仍在摸索,有點進退失據feel。全年遊戲業務收入25.5億人幣,按年跌18%,公司例排賴阿爺停版號(騰訊都係咁),但魏力敢肯定唔係最大原因。展望一節,雷總對手遊的評論只得一句:「現有手遊《劍俠情緣1》表現穩定。」Well,即使唔係凍過水,都唔使有憧憬。

同騰訊一樣,雲服務收入成為唯一亮點,全年收入22.2億人幣,按年飆66%,收入佔比急升至38%,單睇第四季,雲服務收入已超越遊戲。但收入多唔代表有錢賺,全年計雲服務蝕8.47億人幣,將遊戲賺的6.84億輸突。好彩辦公軟件業務穩定,賺3.4億人幣,拉勻條數先叫好睇啲。

今年點睇?好簡單:第一、希望手遊收入上力,抵銷PC game走下坡所引致的收入下滑;雲服務做大個餅之餘,可以輸少啲,咁就善哉善哉!

二、網龍(777)

相比起金山軟件的「爛數」,網龍業績確是令人精神一振。整體收益50.4億人幣,創歷史新高,按年增長30%;經營溢利5.26億人幣,按年虧轉盈不特止,仲創歷史新高。純利4.77億人幣,對比上半年賺1.78億,環比增長68%!

大家都係做遊戲,大家一樣受「停版號」影響,但網龍遊戲收入就創新高,達23.7億人幣,按年增長41.5%;ARPU增64.8%至665人仔,相當勁。公司在展望表示,「計劃2019年推出多款新知識產權及新類型的遊戲,包括一系列戰爭策略類遊戲和多人在線戰術競技類遊戲。集中預期上述新品類遊戲將會帶來非常可觀的收入。」今年仍有不少憧憬。

網上教育方面,對雲服務一樣,就係做大咗個餅,但都仲係輸錢。收入25.7億人幣,按年增長22%,並確立成為網龍收入主要來源。不過,經營虧損由上半年的1.59億人幣,增至下半年的2.62億人幣。蝕還蝕,但網龍有遊戲業務頂住盤數,拉勻仲係大賺,但反觀金山軟件,就做唔到呢一點。邊隻秤先,一睇就知。

現價仲買唔買得?以每股盈利102.42分(折合1.2港元)計,現價(19.2元)市盈率僅16倍,齋計遊戲業務當然係貴(遊戲股一般是8至10倍PE),但加埋網上教育呢部份,16倍就顯得頗具吸引力了,加上券商多預期今年教育業務虧損進一步收窄,盈利前景更為明朗,如業績後「見光死」,不失為上車的好機會。

筆者為證監會持牌人,未持有上述提及股份的財務權益。

www.facebook.com/2012jason