【異動尋寶】加息後個市調轉行？（魏力）

呢兩年先上車的話，起標都講緊7至8球，借錢個lump-sum唔同咗，加一兩次可能無咩感覺，但當個經濟差咗，搵食難咗，股市又惡做，再加多幾次息，咪就係溫水煮蛙feel囉。

本文見網之時，相信美聯儲已「扑鎚」加息四份一厘，而供樓一族最關心的，當然是香港銀行會唔會加P（最優惠利率）？觀乎近排拆息抽爆機，財爺早幾日更來個「窗口指導」，相信跟加是勢在必行。

「對比以前供樓10厘息，家陣就算加多幾次，都仲好低息啫，怕咩喎！」無錯，以魏力為例，供緊H+1.4厘，封頂P-2.85厘，即係2.15厘，就算加1厘，都不過係3厘鬆少少，對比以前息口仲係好低。但問題係，量寬年代之前，一個市區400至500呎上車盤，4球點都有得揀，但呢兩年先上車的話，起標都講緊7至8球，借錢個lump-sum唔同咗，加一兩次可能無咩感覺，但當個經濟差咗，搵食難咗，股市又惡做，再加多幾次息，咪就係溫水煮蛙feel囉。

加息的另一個effect，就係收息股吸引力下降。當「無風險」定存都有3厘息，點解我要買3厘多少少的收息股，但要承受股價下跌、賺息蝕價的風險？你睇中電（002）在兩星期內，由97蚊碌落91蚊，假設閣下唔好彩97蚊接咗貨，家陣已經蝕緊6.2%，但一年先收3.2厘息（仲要股價會除淨扣番），點補得番？所以，咪以為買收息股好穩陣，可以「印印腳等退休」，本金縮水的因素，絕對要計算在內。

講番個市，加息前恒指殺穿28000，高見28031，重熊區接近全清，也升近28100阻力，小心加息後會調轉行。操作上，繼續且戰且走，有糊要食，輕倉過夜，不能貪心。

筆者為證監會持牌人，未持有上述股份權益。
www.facebook.com/2012jason