【異動尋寶】四個反覆偏強的板塊（魏力）

服裝股李寧（2331）回氣至20天線又衝過，首季營運數據符合預期，業績復蘇有望持續，短期有機再試4月中高位9.82元。

上週題為「泥漿摔角，博定唔博？」已指出目前市況下，落場打巷戰，身手要極為敏捷，除了揀股要夠準，出手要果斷，仲要幾乎一買完就排定盤食糊，才可把握一閃即逝的獲利機會。另一個模式，就是細細注「佛系式」坐盤，信心堅定覺得個市未完，睇到好遠，完全不理短線升跌。自問兩種套路都唔適合自己，靠邊站是最好的選擇。

個市零方向感，波幅越收越窄，市場觀點分歧，好友等救市，淡友等冧市，但實際情況是處於「不生不死」的狀態，特別是週五期指結算前，都是上下fing來fing去，最後原地踏步的機會較大。

板塊方面，騰訊（700）由生龍活虎的「股王」、變成弱不禁風的「病鵝」，失守400蚊大關後，猶如洩氣的皮球，日後反彈時，400蚊的「血肉長城」將會由報價機的左邊轉為右邊，成為強大的阻力。暫時整個科技板塊還是少掂為妙。

反覆偏強的板塊有幾個：風電、服裝、金飾及資源股。風電股走勢最靚仔為大唐新能源（1798），市跌唔跟跌，市升就能夠緩步爬升，相當難得，目前保力加通道頂部為1.54元，睇睇有無機會慢慢推上去。服裝股李寧（2331）回氣至20天線又衝過，首季營運數據符合預期，業績復蘇有望持續，短期有機再試4月中高位9.82元。

金飾股方面，六福（590）、英皇鐘錶（887）近期頑強炒上，周大福（1929）回到10天線又再起動，想搵「貿戰避風股」，金飾股是不錯選擇。最後資源股方面，投資者睇通脹升溫，帶動美債息抽上3厘大關，資源股（特別是油股）反覆造好，最「近磅」仍然是中海油（883），其他如兗煤（1171）、鞍鋼（347）也見上升勢頭，不妨留意。

筆者為證監會持牌人，未持有上述股份權益。
www.facebook.com/2012jason