香港股市 將收市,收市時間:5 小時 23 分鐘

【異動尋寶】四年來首回購 億和大炒在即?(魏力)

魏力
【異動尋寶】四年來首回購 億和大炒在即?(魏力)

一隻股票要大炒前,通常會向市場發出訊號,其中最常用的,第一個係回購,滙控(005)一句話斥200億港元回購,股價由48蚊炒到60蚊。第二個係向管理層授出購股權。跟教科書講法,回購係用公司錢買番自己股票,然後進行註銷,藉減少發行股數,令每股盈利增加。至於購股權,管理層對自己公司最熟悉,向自己發options,好少會搵自己笨,多數會確認業務處於上升周期先做。兩樣都做齊,炒上意圖就相當明顯,億和控股(838)就係其一。
 
億和係一隻有趣的股票,難炒但易捉。說難炒,係因為行業周期性大,股價大上大落;貨源歸邊關係,短線波幅亦難料,比較飄。說易捉,因為金融海嘯後的兩次大升浪,個炒法都弦出一轍:回購、購股權雙管齊下,之後就開車。

回購+購股權 2010年喪升9倍
 
2009年海嘯後,管理層低位瘋狂回購,10月就授出購股權,每股0.82元(計及2011年一送一紅股因素,應是0.41元),之後2010年億和最高炒到4蚊,升幅達9倍!
 
2012年6月,公司發盈警後,於0.6元水平不斷回購,3個月共回購7,039.6萬股,涉資逾4,000萬元。公司再於11月初及翌年1月兩次授出購股權,換股價分別為0.69及1.17元。其後兩年,億和最高炒上2.6元,升幅雖然不及2010年,但兩次共通點係,但回購、購股權雙管齊下,之後都會大炒一轉。
 
今次有少少唔同,就係先於7月授出購股權共6,705萬份,每股0.692元,然後本周一(10月31日)作出4年來首次回購,以每股0.83至0.84元回購852.6萬股,涉資715.7萬元。值得留意,前兩次回購一旦啟動,都會持續數月,其後股價都會拾級而上,今次億和會否歷史重演?機會料不低。
 
睇埋走勢,億和8月突破「頭肩底」頸線約0.8元之後,一直守於其上,昨股價受回購消息刺激造好,14 RSI回升至50之上,MACD快將重現牛差距,配合回購買盤支持,屬大好買入訊號,0.87元買入,首站睇250日線1.08元,失守0.8元止蝕。
 
www.facebook.com/2012jason