雅虎香港財經 【異動尋寶】大復蘇龍頭股趁低買（魏力）
個市日日升，「白馬股」炒到外太空咁遠，無圖睇，大部份人都驚接火棒，OK今日介紹個大大大落後、而又準備大復蘇的板塊畀大家，就係油田服務股。
跟開小弟專欄的話，上個月中開始，魏力係咁推介國指，話2018年可以追落後，原因係內銀及石油股，舊年都升唔夠數，今年在「估值修復」行情推動下，上升空間巨大。時至今日，國指本月狂升15%，遠勝恒指的10%，內銀升到你唔信，油股亦拾級而上。嫌油股都係慢咗啲？同樣位處風口的油田服務股，應該是閣下的首選。
點解要買油服股？邏輯是咁的。早幾年油價低迷，試過每桶30美金有找，遠低於產油商的成本價，因此大量油田開發項目暫停，油服股整體由2014年高位狂瀉80%至90%，但如今油股上番60美金樓上，產油商的開採意欲大增，油服股就由無單接變成做到手軟。週一晚安東油服（3337）通告就顯示，上季新增訂單按年急增近1倍，並明言行業復蘇跡象明顯，咁仲唔係買油服股時機？
買股買龍頭、買最優質嗰隻，過去幾年全行艱苦經營，但有一間仍然年年賺錢、兼且現價遠低於每股淨資產，佢就係海隆控股（1623）。海隆業務贏在技術，贏在國際化，2016年海外訂單佔63%，客戶名單除「三桶油」外，亦不乏全球知名的油企，例如最近就獲得阿曼石油兩份鑽機服務合同，為期十年，並可進一步延長60個月，每份合同每年的金額不少於1,000萬美元。
地域方面，海隆揀啱高增長地區進行發展，就是俄羅斯、中亞及東歐，2017上半年，相關收入4.98億元人民幣，按年大增85%，收入佔比升至4成。分析指出，海隆主攻的高端鑽桿產品，在俄羅斯市場展現龐大的增長需求，而通過俄羅斯生產出口，亦可避開美國的反傾銷稅費困擾。管理層月前預期，2017年鑽桿訂單量至少可達4.3萬噸，較2016年大增50%，今年前景仍然看俏。
「低位反彈咗好多喎！仲追？」睇一年圖，大家確有可能出現這個錯覺。事實上，海隆由去年低位反彈6成之後，上日收報1.63元，但仍只是2014年高位6.8元的四分之一。當然，魏力不認為海隆能三扒兩撥重上歷史高位，但能否在現水平再升5成？在目前大牛市的環境、以及行業大復蘇的基礎之下，機會卻是不低的。彭博綜合券商預測，海隆2016至18年的複合年增長可達45.9%，估值、每股盈利雙升，為股價爆升提供助燃劑。
走勢方面，海隆本月初一輪急升後，目前於1.6元水平整固儲力，準備發動下一輪攻勢，下一站將是2017年3月高位2.15元，該水平亦與海隆每股NAV（2.13元）相近，再之後就是2016年底高位2.57元了，去到呢個位，潛在升幅已是58%，但距歷史高位仍是四折有找。
筆者為證監會持牌人，持有海隆控股（1623）財務權益，並可能隨時買入或沽出。
