【異動尋寶】慢牛．快牛．瘋牛？（魏力）

恒指昨日勁漲557點，差唔多兩巴仙，成交1,570億銀，2015年7月以來最多。「牛三來了？」家陣全世界一定係問呢個問題。其實畀魏力揀，我會想牛三遲啲先到，因為一旦確認為牛三，即係升市到尾聲，要開始搵逃生門了。

股票是用錢炒出來，從大市成交判斷，魏力認為港股似從「慢牛」邁向「快牛」，但暫時還未到「瘋牛」階段。何出此言？只要望望股份升跌比例，就可略知一二。根據小弟所用的報價機，昨日上升股份只有850隻，多達962隻股票下跌，上升比例一半都無，只有47%。

三個現象 過往升市罕見

再睇深入些少，50大跌幅股份，至少都跌7.2%以上；而50大升幅股份，只要6.7%就可以入榜。 更甚的是，以往指數一大升，資金就會搵落後股去炒，今次剛好相反，資金反而血洗細股，轉投大股懷抱。 這三個現象，在過往的大成交升市可說絕無僅有。

以上三個現象，帶來甚麼投資啟示？第一，「見龍頭升追二三線」呢招以往牛市慣用伎倆，或者已不再管用。在「贏家通吃」的年代，即使行業「一哥」跟「二哥」的差距也越來越闊，舉個例，講手機遊戲，騰訊（700）跟網易已經是兩個層次；講電子商貿，阿里已經拋離京東幾條街。超級巨企越來越屈機、霸道，行內其他公司自然難有運行。據此邏輯，資金確有可能繼續只炒龍頭，畏高的投資者在這個浪恐怕難有作為，死揸落後股更隨時損手爛腳！反之，當閣下見到雞犬皆升（可能只有數天），就是水尾中的水尾了，是時候奪門而逃！

死揸落後股 易損手爛腳

第二，多得北水長期供港，大價股當細價股炒將經常出現，週一的騰訊、昨日的平保（2318）就是好例子，幾千億、幾萬億市值的公司，都不再是蝸牛，反而在衍生工具助燃下越升越勁。「細股＝妖股」觀念在大陸太深入民心，加上不在港股通之列，此消彼長之下，自然缺水嗌救命。望住每日收市update的北水成交表搵食吧！（昨日北水淨流入45.5億人幣，騰訊佔10.7億，平保7.2億）

如果慢牛真的變快牛，成交日日1,200億樓上，最受惠唔使講一定係港交所（388），昨日更罕有打入港交所（深）十大成交榜，淨流入2,847萬；過去3個月，北水持股量由0.8%逐步增至1.1%，平均買入價219.2元。家陣買唔買得？都係嗰句，用強勢股分注買法，合埋眼先落一注，等回氣再補飛，萬一真係唔回，閣下都起碼有一注在手，唔會完全miss咗升浪，係咪？

www.facebook.com/2012jason