香港股市 已收市

【異動尋寶】手機股排隊盈警 危定機?(魏力)

大市氣氛暢旺,但手機設備股卻排住隊發盈警,繼舜宇光學(2382)、通達(698)之後,瑞聲科技(2018)連2019年首季盈警都出埋,純利按年跌65%至75%,大大鑊!

原因方面,其實不用「左遮右遮」,畀客cut單就cut單,連季節性因素都搬埋出來,實在唔make sense(每年第一季都弱,點解今年跌得特別多?),真係要「零分重作」!難怪大行都無面畀,幾乎一致將目標價劈落「三字頭」,大摩仲整多份短線報告,話未來15日,瑞聲7至8成機會要跌,目標價33蚊。瑞聲昨日埋單隊14%,勉強守住50蚊,即管睇下大行威力勁啲,定係「虛幣KOL」疊水啲(笑)?

手機股盈警停不了,執筆之時,輪到比亞迪電子(285)傳來噩耗,預期2018年度盈利按年減少13%至16%,原因好簡單:一、2018第四季業績好差,拉低全年盤數;二、研發開支增加。

第一個原因,影響全行,唔太特別;第二個原因,某程度上係好事,站在公司角度,反正舊年條數唔見得人,不如將CapEx盡book,做低個基數,等今年來個「鯉魚翻身」?

2017年公司賺25.8億人幣去計,2018年就賺21.7至22.5億人幣,現價(11.54元)計,2018年市盈率9.6至10倍。重點來了:現價平定貴?

炒股炒前景,今年大主題係5G,三星、華為最近出發佈新機,焦點都落於「摺芒」,但賣成1.7萬、甚至2萬人仔一部,唔慌賣得多。不過,開高咗個價,令人慢慢習慣「5G摺機」係咁貴,之後只要稍為減一減,肯定會爭住搶,大廠訂價策略,莫過於此。

近年比亞迪電子主力研發「3D玻璃」,就是為食5G機呢一浪鋪路;唔淨止手機,日後物聯網(IoT)呢個市場,先係全新藍海,到時3D玻璃自然大派用場。

中金近日報告估計,今年比亞迪電子可回復1成的盈利增長,不過不失,而2020年相信才是盈利爆發點,總括而言,前景已轉趨正面。如今日因為盈警而顯著低開急跌,不失為一個中長線部署的機會 。

筆者為證監會持牌人,未持有上述股份財務權益。

www.facebook.com/2012jason