雅虎香港財經 【異動尋寶】手痕博彈又中伏 點算好？（魏力）
博反彈從來是高難度動作，點解？先解釋一下。
反彈第一棍，驚魂未定：「係咪死貓彈嚟㗎？早兩日/啱啱先減完貨，一身鬆哂，又要我反手追番？咪玩啦！唔趁高沽你都偷笑呀！」
反彈第二棍，大陽燭，你望住個mon，開始心動，但仍然猶豫：「哎，騰訊（700）上番我沽貨位㖭，XYZ（心裡面爆粗）！追番又好笨，唔追又驚買唔番…算！等多陣，技術性反彈，嚇我唔到嘅！」…之後去到午市，成千隻股票升：「哎，如果我今朝追咗xxx咪好囉，即執廿格呀！（內心開始瘋狂爭扎）個市係咪真係跌完㗎？（頭髮亂了，心更亂）死就死！雞仔注買一隻，止吓手痕先！（落盤）」
反彈第三棍，個市低開又一級級上，雞仔注個隻升咗5%：「哎昨日做乜鬼咁細膽，大注啲夠位走啦！算，兩千銀都執咗佢先。（越來越多fd落場）呢個位唔博好蝕喎，買多兩隻，大注啲，博佢上番之前高位就發了！（加緊落盤）」
第四日，高開急插水，第三日大注追的股票，又一次全線坐艇。
以上所講，是否閣下呢幾日的心情？能夠在3萬點清貨，殺到28200又輕鬆買番的人，相信是萬中無一的高手，如果你是其中一位，恭喜你！但實情係，投資者無論如何冷靜，都難免受市場氣氛影響，會貪，更會驚，高追然後又低斬，本金／利潤就在反彈市上上落落之間磨走一截，最傷士氣莫過於此。
炒得股一定有賭仔性格，有錢就身痕想落場博。所以，目前市況下，硬性將今年利潤從戶口提走，盡量縮細個本，係止痕／止損的一個做法，魏力上週已付諸實行。「今年個倉仲輸緊，依家要追數？」 咁閣下應該唔太適合炒股，回頭是岸吧！
www.facebook.com/2012jason
