【異動尋寶】有波幅就有得賭?(魏力)
熊二大彈希望幻滅,港股徹底進入「生人勿近」的市況,還好與上次熊市比較,賭具選擇越來越多,左手一隻牛,右手兩隻熊,升跌唔重要,有波幅就有得賭,每日trade出trade入,身水身汗之後,拉勻贏一百幾十點,夠開飯矣。
有粉絲更同魏力講,自己專揀收市前幾分鐘,買最貼價的牛/熊,博第二日gap up/down,升嗰日就買熊,跌嗰日就買牛,博中分分鐘第二日開市就double!「開對家咁點?」我問道。「買一兩千蚊,預咗total loss,唔中咪第二日收市前再賭過,無事嘅!」純賭運氣,根本唔理個市點走(反正都唔識睇),呢種六合彩式賭法,近月越來越有市場。
施政報告硬推「東大嶼發展計劃」,填海1,700公頃起人工島,即係大約1,700個標準足球場咁大。航道、環保當然係一大難題,問題係起完個島仲有起公路、起鐵路,件件超支的話,庫房掏空是必然的事,仲要氣候暖化,水位越升越高,當首階段2030年起完,剛好淹沒又可以超支再起,呢條數隨時下一代都未找完。
另外,施政報告又重提「活化工廈」,好幾年前搞過一轉,成果非常有限,之前魏力同一家千億市值、做地產的高管傾過計,佢就話「活化工廈」太多限制,好多大廈設計上都整唔到升降機,已經係一大限制,仲有消防條例好多嘢要搞,基本上活化空間好有限,最多整幾間餐廳,有幾大作為?