【異動尋寶】服裝股遺珠 靜靜起革命(魏力)
近排個市日日都玩「特習」,所講的是「侵侵」特朗普及習大大,日日「你一言、我一語」,一時針鋒相對、辭詞強硬到暈,一時就「永遠朋友」、又開放市場、又增加進口、關係好到不得了。個市就被這些「語言偽術」玩到謝,一日之間可以「來回地獄又折返人間」,除非閣下是全職炒友,分分鐘可以望實個市,否則呢個市魏力會勸你「時運高、睇唔到」就算,無謂偷雞不成蝕把米。
全職炒又該如何操作?反彈市呢幾日,魏力都係即市「大注快衝」,集中只炒兩三隻,去到尾市,就算有勢都要食一半,另一半博埋聽朝;一係索性埋單計數,以免夜長夢多,有覺好瞓。咁炒好辛苦?一定係,但總好過儲儲下又一手蟹貨。
個市大方向仍然睇落,即使有反彈,31000已經好盡,因為政治市的慣例是,氣氛紓緩幾日後,又會再次緊張,是但一方又會「講錯嘢」搞衰個市,呢頭博中兩隻股、賬面賺住5%、8%,你想貪多少少,「博多一棍唔過份吖」,咁就出事,第二日gap down又回到起步點,咁你走唔走好?唔走再落多幾巴仙,由贏變輸,咁就輸錢兼輸士氣。呢個市最磨人之處,既是本金,更是信心。
波司登破三年大橫行區
推介方面,可留意剛破三年「大橫行區」的波司登(3998)。內地服裝股、嬰兒股炒「消費升級」炒到飛沙劈石,不少散戶一直以為冬天先有得炒的波司登(因為賣羽絨),臨近夏季才靜靜起革命。事實上,公司除羽絨外,近年積極發展女裝及童裝業務,管理層預期,未來羽絨及非羽絨業務收入將為六四之比,反映個餅越做越大,有利未來收入及盈利提升。
截至去年9月底止半年,波司登純利1.75億元人民幣,按年增長11%,連續第兩年錄得增長,相信經歷過去幾年轉型、打穩根基後,公司增長步伐有望加快。由於公司計算業績的下半年介乎10月至3月份,屬於羽絨銷售的高峰期,相信盈利佔比會較上半年為高,以全年純利4億元人民幣計,折合5億港元。每股盈利4.7仙。現價預測市盈率17.2倍,加上派息有望增加,估值仍有一定吸引力。
筆者為證監會持牌人,持有波司登財務權益。
www.facebook.com/2012jason