雅虎香港財經 【異動尋寶】港股上衝的三個隱形地雷（魏力）
港股終於破關而上，創21個月新高，前日仲講緊要落二萬四，轉眼間距離二萬五已是一步之遙。氣氛突然好轉，源於一個傳聞：《一帶一路峰會》將於本周日及下周一在北京舉行，《彭博》報道話，國家隊將在5月8日至16日入市維穩，即係「蜜月期」已悄悄開始了。消息一出，A股即時V彈，港股好友順勢發力，將恒指推至接近24900點。
執筆時ADR再漲近百點，逼近25000大關，但形勢是否一片大好？至少有幾點要注意：第一，雖然A股反彈，但滬深兩市成交合共僅3,481億人仔，缺水情況未變，頂多算是技術反彈，仲要係弱雞個隻。
炒反彈要快手 吼實三板塊
第二，維穩期只係去到下周二，即有5個交易日，而話明係一帶一路峰會，反彈焦點應集中在基建、機械及部份資源股，唔係阿貓阿狗都識彈。博反彈要識揀，有多重概念的股份可以秤先，例如金隅（2009），集水泥、內房、雄安概念於一身，加上回得夠深，短彈的水位會比較多。另外，業績持續復蘇的重卡股如中國重汽（3808）也可考慮。仲有最重要係，有賺要識走，提防峰會後再度散水。
第三，指數破位，理論上基金大戶會risk-on，追high beta股份，沽出防守股，但望望港鐵（066） 、中電（002）、領展（823）股價，下月美國又加息，點解仲可以升得咁兇狠？連快餐股大快活（052）都破「圓底」頸線而上，大戶角度去睇，似乎對今次升浪半信半疑，且戰且退咁款。另一邊廂，北水繼續掃滙控（005）、沽騰訊（700），搞邊科？未搞清之前，戒心不可少 。
舜宇淡季不淡 隨時再起動
呢輪領放的板塊，非科技股莫屬，納指連創新高，固然是一大助力，但科技股的高增長潛力、盈利前景才是資金追捧的主因。據個例，舜宇光學（2382）昨公佈4月數據，其實管理層一早放風3月、4月為出貨淡季，條數會無咁靚仔，但3月數據一出，依然省鏡；4月手機鏡頭出貨量按月又增長9.3%，按年更飆升1.1倍，應是令市場喜出望外。雖然車載鏡頭、手機照相模組按月分別跌3.8%及9.7%，但大行報告多已作預期。4月數據一過，市場將憧憬5月、6月出貨量會反彈，股價隨時再起動。
