【異動尋寶】無倉一身輕 vs 持貨博過年(魏力)
情人節加上快到年三十,節日氣氛濃厚,加上北水暫停供港,入市意欲低很正常。觀察呢兩日市況而言,魏力想分享兩點:
一、好友上週被斬到一頸血之後,目前心靈非常脆弱,一有風吹草動即撇,以週一(12日)為例,3點鐘左右,美國十年期國債孳息率升穿2.9厘,個市極速散水,最後倒跌收場。尚有小量持貨的魏力,當然都做咗「慌失失奇兵」,尾市臨急臨忙買隻熊仔,務求掩護自己手貨,真係好多年都未試過。雖然第二日朝早隻熊仔要輸一成「啪咗」,但只係抵消咗手貨的部份升幅,總算執番身彩,執筆時諗番仲係一額汗。
二、長假將至,為免期間美股又爆大鑊,就算敢落場買貨博彈,都係以daytrade搶雞糊為主,故午後就開始洩氣。另外,新股紛紛低開潛水,也反映市場「劫後餘生」過後,目前氣氛相當審慎,短線要V形勁彈機會甚微。
長假過後,藍籌業績期就會展開,打頭陣係年初五(20日)中午,滙控(005)將公佈2017全年業績,睇盈利之外,更睇派息及回購。但值得留意,早排掃滙控掃得好狼死的北水,要到年初七(22日)才回歸,即係話萬一滙控業績好樣衰,北水都要過兩日先沽得。「咁佢地咪好蝕底?」但換個角度睇,明知要承擔無得沽的巨大風險,北水都照掃如儀,又是否有一定啟示?留待戰友自行判斷。
放假前不作推介了,策略上,目前無貨/輕倉當然可以大覺瞓,如果多貨的話,最好都係買定保險,期權、輪證,以至反向ETF都好,咁就可以安心持貨放假去。
農曆年後再見!