雅虎香港財經 【異動尋寶】限時搶錢時段 如何部署？（魏力）
個市繼續挾到你唔信，恒指升到28500，創近半年新高，各板塊全面起動，成交1,210億元，創今年新高，氣氛相當旺，資金開始亂炒一通，也預示反彈浪進入最後階段。
為何認為是最後階段？
一、港交所（388）飛升。打開幅股價圖，目前的港交所走勢，同2018年1月份係咪好似？
二、券商股（特別係土炮券商股）一湧而上，呢下非常symbolic，鑊鑊都係升浪尾段先開車。
三、一路「避席」的散戶開始入市；一路「誓神劈願」唔重貨的戰友，開始忍唔住「狗衝」。（唔好有口話人，魏力上星期五開始都加咗倉，也是一個警號）
「最後階段？咁買嘢定沽嘢？」咁要分幾類人來講。
最醒目嗰批：1月初已開始買貨的話，應已賺了不少，有利潤在手，可以用利潤博埋呢一轉，主力都係短線hit and run，也要嚴守止蝕。
最大路嗰批：1月中至尾段先買貨，應該都有賺，但不多，個別買得唔靚的話，更可能捱緊價。呢類散戶應佔最多，正路係有貨繼續揸實，等急升就沽出獲利，但不宜再加大注碼。
最審慎嗰批：到依家都無貨／極少貨／甚至揸住淡倉等跌的話，證明對市況敏感度及把握力不足，之後即使是「限時搶錢時段」，也只宜以少注炒炒即日算了，絕不宜越買越多，搞到成手都係貨，否則很可能就是最後接火棒嗰位。想追回報？相信已太遲了。
