【異動尋寶】騰訊「光環掉下來」?(魏力)
先講幾句騰訊(700)業績:差係預期之中,但Q2盈利去到按年倒退的水平,確實也是嚇一跳。有說買騰訊是一種信仰,buy佢長賺長有的無敵增長故事,但今年第一季業績後,光環開始出現裂痕;去到第二季業績揭盅,直情有種「光環掉下來」兼碎到一地都係的感覺!無錯,微信10億活躍用戶,無花無假,用戶黏性好高,以「得用戶得天下」的邏輯,理應繼續大賺特賺,但為何近季用戶變現的速度開始放慢?是否一直堅固的護城河已見缺口?一旦增長故事不再,護城河失守,騰訊還值不值33倍PE?賣個關子,有興趣睇多啲分析,可到小弟facebook,昨晚已貼出不少的看法及目標估值,可以參考。
講番正題,業績期變洗倉期,盤數一開,唔好固然要九秒九清貨;如果係好,你會點諗?等人買上去畀自己食糊?No No No!係趁未見光死/好消息出貨前,嗱嗱聲走咗佢呀!一念之差,隨時由賺變蝕。
點解業績好都要跌?業績係反映過去,而股價卻是反映未來。上半年係好,因為當時貿易戰仍在吹水階段,未殺埋身,又未爆土耳其危機,經濟仍在高位。但下半年呢?宏觀經濟去睇,如果我話下半年會差過上半年,應不會有人反對,推演落去,絕大部份公司生意難做咗,業績應會比上半年差,既然股價是反映預期,業績後向下就順理成章了。
咁仲博唔博業績?打個比喻,外面槍林彈雨,地下有張100蚊,你會唔會行出去執?執到都係100蚊,執唔到就賠上性命,呢個市,係風險與回報不成正比。
面對目前疲弱不堪的市況,大約有三種處理手法:
一、現金為王。呢種方法似易實難,皆因人就係有鋪賭癮,見跌得多,望住之前個高位(學術一點叫錨定效應),就覺得「跌咗咁多,總會彈番啲」,買少少博吓又中伏,儲儲吓由無貨變成手蟹,易過借火。
二、避去防守股。防守股一般特徵是:現金流強、派息穩定,業務受經濟周期影響微,例如公用、房託股。暫時避一避是可以的,但當個個都撲入去,就會變人多擠逼,息率下降,PE推高,最後還是會回落,屬於「輸少當贏」的玩法。
三、打反手。散戶買牛熊、put輪,反向ETF,大戶就沽空。呢招最難捱就係挾倉個段,萬一重手得劑,一挾淡好易頂唔順,又或心理壓力太大而斬倉。最重要都係細注去做,將每日倉位波幅降低,勝算才會提高。
筆者為證監會持牌人,未持有上述股份權益。