香港股市 已收市

【異動尋寶】2019年炒股要做的五件事(魏力)

回顧2018年,港股幾乎由頭跌到尾,執筆時今年恒指挫近12%,國指則插14%,美股12月更上演「熊」色聖誕,道指單月瀉逾13%,勢創2008年金融海嘯以來最大單月跌幅。2019年,係咪只會更加灰?

根據目前證供判斷,後市必然係衰到暈,理由包括但不限於:貿易戰有排打;大陸經濟放緩;債務、樓市危機;特朗普連聯儲局主席都想炒(或逼後者自己遞信走);美國政府局部停運;美債息隨時倒掛,經濟衰退殺埋身;非洲豬瘟肆虐;港美息差繼續擴闊,資金恐大舉流走;油價大崩盤,全球通縮……繼續數落去,可以寫到下年。

OK,真係好差,世界末日咁款,有人話呢鋪係宇宙級大清算,之前幾次金融危機加埋,都唔夠今鋪咁杰,要死揸現金呀!要移民去火星呀!魏力話家陣條街,超過9成人睇淡出年會「拎拎拎」,應該唔會有人反對?

咁小弟先弱弱一問:「你覺得依家個經濟環境差啲,定2017年初差啲?」答案呼之欲出啦!但2017年初,恒指trade緊22000,依家恒指25000幾喎!正路去睇,肯定未跌夠啦,但傳統智慧又話你知,股市係「反映投資者對未來的預期」喎。真係R哂頭,大部份投資者睇到出年「拎拎拎」,但個價又唔係「拎拎拎」喎,會唔會係代表大戶睇出年,可能無想像中咁差呢?所謂「唔怕一萬,最怕萬一」,萬一出年真係唔太差,咁應該點做?

一、目前手握現金,但都要留意住個市,積極等機會出手,而唔係消極地拎哂啲錢去做定存,然後delete埋個報價app。可以出手的時間,會比你想像中來得快(賣個關子,等魏力下月教書有嘢講吓)。

二、美國出年減慢加息(起碼唔會加4次)已成定局,加上歐央行停QE,出年美匯指數睇跌。跌幾多唔知,但唔會係今年「萬劍歸宗式」由頭強到尾,老套啲講,係反覆回落格局。美元轉弱,利好金價,依家正正係出現呢個情況。

三、留意A股,做定功課。A股今年跌到仆直,但外資(當係啦)經滬深股通北上淨買入A股近3,000億人仔;滬深ETF基金申購份額急增,10月、11月共達248億份,反映長線基金正為「入摩」、「入富」加強部署。如選股無心水,可分注跟吸A股ETF。

四、就算個市真係大彈,開頭大部份人信心都唔夠,搶雞糊好正常,搞到個市好chok,所以先輕注出手,贏順咗先加大少少注碼,但記住唔好孖展買突。

五、買龍頭就夠。唔好再用放水年代的「龍頭升、追龍尾」,家陣係收水年代(雖然可能會收慢咗),呢種套路唔work喇!有錢人只買優質資產,加上行業整合,強者越強,笨笨地買大路嘢,隨時贏最多!

www.facebook.com/2012jason