雅虎香港財經 【直播搵真銀】有米金主單月課金逾10萬 「我係做批發生意」
人氣主播要衝分數贏比賽，全靠背後金主打賞支持。不過，這些金主神秘莫名，多躲在鏡頭背後，年紀職業樣貌外界一無所知；本報找到直播金主Steve（化名）親述迷上直播的心路歷程，他更為主播護航，稱「主播非常之努力，唔係就咁撳個電話」，每月更動輒花費數萬元，甚至過十萬元「支持」！
「咁又唔好話寂唔寂寞，就好似平時聽歌、打機同睇戲咁，都係為打發時間啫。」面具背後的Steve長相與一般人無異，40來歲中等身材，穿休閒裝束，但舉手投足頗具生意人味道。他稱做批發生意，不時到外地出差，可惜外國商舖早收舖，一人百無聊賴，得朋友介紹便接觸直播，距今接近兩年。
街外人一般難解直播動人之處，Steve稱自己較懶，工作又繁忙，故透過互聯網認識朋友方便得多。「直播間同一時間有大班人即時同你傾偈對答，除咗主播，仲可以同其他觀眾一齊傾。」「成件事反應、感覺真實到好似傾梗電話咁快，而唔係打完一堆字等人慢慢覆。」
直播有好多種，有傾偈、唱歌、跳舞，甚至賣弄性感等，不過並非個個都適合Steve收看。他稱自己最愛傾偈交流，「才藝冇需要係直播度睇，本人比較鐘意交流，有啲互動會開心啲。」他表示，通常談的都是生活趣事，因為許多主播均有正職，例如當模特兒等，故會在直播分享上班趣事或當日遇到的人。
他建議，觀眾除了聆聽之外，最好可以回應。「唔畀（回應）嘅話，主播唔知點講落去，主要靠留言同我哋反應而繼續傾落去，間唔中可以開新話題。」所以他非常欣賞這些主播，認為有落力做功課，才得以「喋喋不休」陪大家談天說地。「唔係就咁撳個電話，背後做好多準備。要溫書，又要化妝，執好自己個樣唔好hea住見人，佢地壓力就係每次直播有冇人睇、有冇人支持！」
眼見主播們如此努力，他說作為朋友不免送虛擬禮物支持一下。「自己做批發生意，現金流鬆動啲，有時都會使到多過10萬（送禮），平均都有4萬。」問到每月送禮多於尋常打工仔月薪，會否太豪爽？「出去吃喝玩樂都有機會使錢，只要覺得自己值得而又唔係入肉，冇咩所謂。」
那麼努力送禮又是否為「識女仔」？他稱，自己雖然是單身，但強調並非為識另一半而玩直播，指當中有不少已婚人士、甚至已有小孩的家長玩直播。他不禁感嘆，年齡漸長，朋友圈卻愈窄，全靠直播認識到不同年齡、職業的朋友，從而增長見識。
直至訪問結束，Steve始終不願露出盧山真面目，除了全程將頭髮收在面具後，更不時拉長衫袖遮掩手掌，惟恐他人認得。他隔著面具跟記者說，「始終有少少唔係好想畀人知，我就想係呢度同大家講，呢個時代，大家要接受呢個程式發展，呢個係大勢所趨。」
