【經紀Secret】大行宮心計 日日有得睇(花生友)
地產行頭人事複雜,日日明爭暗鬥,特別是某一間龍頭代理行,個個返工好忙,但就是忙著搞關係搞批鬥,開單反而是其次。以下呢單嘢雖然舊舊地,但一日班人仍繼續做,續集仍然會不斷上演。還記得一個其貌不揚、身材不突出的「高妹」,多年前駐守南區一個大型屋苑做經理,當時個人都已經幾串,同一個大區其他經理都唔多妥佢,話佢個人麻煩。
後尾唔知咩事,佢忽然間過在九龍區跟「女王」,「女王」都算唔話得,好多大場合都帶埋佢出去。點知隔咗一排,「女王」離職,聽講話同大小姐有少少爭執之類,而「高妹」就一個屈尾十返返港島區,但職位就比以前更高。
本身都以為是一單平常事,可能係邊度多盤,佢就要求調邊區,點知有小道消息話,原來當年搞走「女王」的其中一個人,正正就是「高妹」,目的就是想坐正;但「女王」臨走前的要求,就是要趕「高妹」返過港島。
咪以為「高妹」返返港島就無事,可以安份守己,聽講佢成日講老頂是非,話佢做嘢唔得,話佢偷懶,仲搞小圈子分化同事,可惜暫時都未能成事,電視劇都有教「唯女子與小人難養也」,有時睇高層勾心鬥角,真係好睇過tbb。