雅虎香港財經 【經紀Secret】 新盤按揭陷阱（樓民）
新盤銷售現場（與個案無關）
近期又有買家報稱被經紀誤導，計錯數，因此未能造按揭上會，最終被迫撻訂收場。其實聽都聽到有點悶，悶到拎來拍警訊都略嫌長氣，偏偏呢個世代都仲會有人中招，好多人可能會問，究竟係騙徒技術高超？
樓民可以好確實咁答大家，騙徒技術並不高超，而是當事人真係好豬。據報紙報道所講，當日事主係行行下街被「街霸」撈上售樓處，所以我有理由推斷，當日個經紀並非高學歷或具相當經驗的從業員（唔係話歧視人，不過一般街霸個樣、個格、個形象係點，相信大家心中有數）。純情買家被撈上去睇完示範單位之後，就相信一個素未謀面，兼並非按揭方面的專業人士，走去同你講一個咁複雜的按揭產品。情形就好似一個唔屬於健身中心的職員，走來sell你買健身中心套票年票，然後同你講，健身中心會借埋錢畀你買呢堆套票。咁作為正常人的你，應該點都會搵健身中心的人來查詢一下卦？所以呢單嘢，文雅地講，我會話個買家係咎由自取囉！當然，我取笑個買家係一件事，唔代表我好支持經紀的不良銷售手法。就好似你睇警訊，永遠都會取笑受害者一樣。
不過認真又老套咁講句，近年發展商為咗促銷旗下物業，都會有層出不窮的按揭計劃氹買家落疊。而唔同發展商對貸款者的財政能力有唔同要求，有啲發展商會出「呼吸plan」畀買家（呼吸plan即係發展商對貸款者要求極低，基本上只要買家有呼吸就會批），但唔係間間發展商或者個個樓盤都係咁。而且發展商借得畀你，正常都會希望你有還款能力，好多按揭plan佢係有喺度歡迎買家申請，但申請唔係保證獲批，萬一批唔到，就好似上述受害人一樣咁大鑊了！
樓民在此再次呼籲，地產代理專業知識在於物業買賣流程，同埋唔同物業的特質，邊個物業好，邊個唔好，邊個適合你，邊個性價比高，佢哋會答到你。至於按揭問題、法律問題，唔排除大部分經紀有基本知識，但唔好expect佢哋係專家，有時答咗你都唔好信到十足。其實大部分新盤都有銀行按揭sales駐場，唔明可以問問銀行職員，又或者問返發展商，千奇唔好懶。
=============================================
