雅虎香港財經 【經紀Secrets】新盤搲回佣 小心貪字得個貧（樓民）
近年買新盤，除非你買嘅係億億聲的超豪宅，否則入飛抽籤已經係指定動作。而作為地產經紀，為咗令買家跟你入飛，回佣畀買家亦係指定動作。無他嘅，話明新盤，又點同二手呢？市場資訊一定充足，任何人上一上網，甚至乎打開份報紙，所有新盤資訊已經手到拿來，完全唔需要經紀畀料，亦唔需要好似二手盤咁，要靠個經紀傾價；唔好話傾價，就連個成交期，經紀都唔需要協助買賣雙方去達成共識，亦唔會有咩問題需要經紀幫手拆解。老實講，經紀與經紀之間，在新盤戰場上唔鬥回佣，我都諗唔到仲有乜嘢可以鬥！
買家都唔係傻仔，睇準你班經紀為咗開單無所不用其極，於是乎搲回佣就有咁盡去咁盡，不斷挑戰經紀底線。不過有時貪字得個貧，買家去得太盡有時傷嘅最終都係自己。樓民就聽過一個大快人心，買家被經紀冼鑊金嘅故事。
事緣係有個買家，想買一個新盤2房單位，樓價折實大約800萬元左右。以一般發展商畀佣最少兩隻半（2.5%）計，涉及佣金20萬左右。於是佢地就搵左2間唔同經紀行，分別睇咗2次樓。之後就有經紀出offer畀佢地。
經紀A率先出個offer，佢受買家講，如果肯跟佢入飛，佢可以回少少佣，不過出手就低少少，回0.5%。買家當然唔會接受，而當佢好沉默咁諗緊點回應經紀A之際，電話來電鈴聲劃破了片刻寧靜，而打電話來的，正是經紀B。經紀B開出一個好正常的offer，回足一隻，即係8皮左右。劇情發展唔需要多講，買家緊係唔會放過呢個經紀互相廝殺嘅機會，食住個勢兩邊bid，睇下邊個回得最多最盡就幫襯邊個，sorry，唔應該講幫襯，應該係「益__」邊個先真！
點知喺呢個時候，經紀A使出絕招，唔係回九成，因為九成都未夠絕，所以佢回夠九成半！係！你無聽錯無睇錯我都無講錯，真係回九‧成‧半！經妃B知道，好老實咁話畀買家知佢做唔到，佢仲話好唔make sense，任何老細都肯肯定唔會批。買家都知回咁多係好唔尋常，所以佢都好小心咁再三double confirm加多個triple confirm，係唔係真係回到咁多。而經紀A亦不厭其煩地double confirm加triple confirm買家，真係可以回咁多，誓神劈願話拎晒approval。然後買家最終都決定「益__」經紀A，見經紀A咁幫到手，買家仲差點想同佢滴血為盟！
個新盤係之賣樓之前一日抽籤決定揀樓次序。真係天時地利人和咩都企晒買家嗰邊，買家抽到前籌，仲係肯肯定會買到嗰隻。買家知道自己仲差一日就步入人生勝利組，之前一晚開心到瞓唔著，仲來咗個勝利巡遊，將喜訊公告天下。而公告內容重點除咗係自己幾咁英明之外，佢亦不忘提提大家下次買樓記得搵返經紀A，因為佢會回到九成半畀你！
好，大家睇到呢度，係唔係覺得結局一定係無良經紀氹完買家落搭最後其實係開空頭支票一毫子都無回到畀買家呢？錯晒！大家花咁多寶貴時間同精神睇咗咁耐，我樓民又點會交咁行貨的結局畀大家呢？
結局係：埋到枱揀完樓臨簽文件之際，經紀A突然同發展商個staff講「我係買家朋友，唔係經紀，個客自己來買樓，無經過代理，呢單係direct deal你公司唔使畀佣任何人。
買家當堂唔知點畀反應，首先十九幾萬回佣見財化水，其次係果一刻又無理由放棄唔買，除咗因為抽到前簿仲難過中六合彩之外，唔多唔少亦都因為尋晚個勝利巡遊已經唱到全宇宙都知，如果買唔到，買家就會由型到世界盡頭變__到世界盡頭。結果買家係谷住道氣都簽咗，正式步入人生勝利組大舞台。
=============================================
