【股壇衝鋒車】牛市應膽大心細(周沖)
大市執筆時在27300點,但見到升跌比例開始越來越小,即係好大部分的升幅都係升埋一邊。中午匯豐出業績又提及再加20億美元回購,執筆時高見$78.75,看來$80蚊都係呢短期內可見的事。早前推介的和記(0215)以高價賣出業務,但周沖覺得佢無話派高息又無其他表示,所以都示意在今天沽出換馬了。早前推介的洛鉬(03993)今日破頂,有貨在手的戰友唔洗問我了,坐住等,今時今日可以上到破52周高位的股票唔容易,希望再上1-2成吧。
其實周沖喺呢個幾月不斷強調越強越要追,有好多人會覺得好高啊點追啊,但事實睇番都係炒破頂股先有錢賺。睇吓滙豐、騰訊、吉利同埋最新加入的恆大,就知咩叫有買貴無買錯。音樂椅幾時會停無人知,但升到越高越要縮減注碼和定近一點止蝕位。基本上北水定價已經成為事實,因此大家要多上一點國內的財經網站,才可以知己知彼。
周沖今日無咩特別推介,因為講來講去都應該係果三幾隻,如果真係要留意就破頂股我會睇中國遠洋(01919)。雖然覺得佢天價收購會不利股價,但見到股價卻逆勢上揚。見到呢類就破頂的股份只能夠合埋眼向前沖,恆大地產如是,吉利汽車如是,呢隻應不例外。
買入價:$4.7 目標價: $6.0 止蝕價:$4.4
周沖