【股壇衝鋒車】眾人睇跌值得吸納(周沖)
大市在此星期好似點左穴咁,在幾百點波幅上落,大部分戰友都大叫無癮。除左騰訊(0700)一枝獨秀外,其餘股份都有點弱。國內在雄安概念一野打破之後回歸平靜,始終這一仗對於國內機構及游資是一個警號,原來國家隊都會承著好消息出貨,為國內股民打了一大巴掌。
比較起來港股算是表現好,雖然大部份人都認為十個牛皮九個淡,但周沖反而覺得下半年是港股的機會。對於港股受北水影響已經係毋庸置疑的時候,作為中國股民見到國內的政策影響,連T+1高拋低買都不被准許時,就會更加覺得香港市場自由的可貴。再睇番這一浪還留在港股炒作的舊人真的少之又少,一代新人換舊人之時代也是慢慢交替。雖然可悲,香港的樓已經不是大部分香港人可以負擔,樓市如是股市如是。殼股的概念都是因此而生,大家可以睇下每個月有幾多隻股係賣殼就知唔只股民轉,連股票的東家也都轉人,唔想被市場淘汱唯有順市而行。
講番之前的推介,最多人係facebook問都係汛和(01591),大部分人問都係因為在$0.13以上買入,去到今日為止穿左減持價小小。其實買呢一類股份,通常出公告或上版果日都會大炒一野,但可以見到去番近招股價阻力十分大,原因係雖然要賣但都重要等多半年,第一口減持價其實會係一個好好的指標。原因過往幾隻賣殼的在到期後都唔會低過第一口價。好啦,依家等同買樓花,你明知賣家咁心急一到半年交左25%比人,仲要市值得$4.5億。早排賣得成的建築殼閒閒地都7億元啦,咁你話呢個位應唔應該止蝕?預算市場估值7億的話有潛在升幅45%,買新樓樓花呢?周沖就話寧願學下買殼好過高追買樓花啦。希望一次過答哂各位戰友。
周沖
chowchung123@yahoo.com.hk
http://www.facebook.com/chowchung123