【胡．說樓市】壓軸大盤 觀塘「凱滙」揀則攻略！

年度壓軸大盤，位處觀塘嘅「凱滙」開價有驚喜，加上位置優越，振奮一手市場氣氛，當個個都睇中該區重建前景之際，開則又點樣揀好？一房、兩房點揀先精明？

信和華置及市建局在觀塘的「凱匯」，首批推205伙，兩房佔多數，即供折實891萬至1,151萬之間。

純兩房暫時只推出「K室」及「L室」，兩邊單位平均呎價都一樣，高見22,260元呎，分別在於「K室」有550呎，比「L室」540呎略大十呎。

十呎差距，準買家多付22萬幾，內櫳有無分別是揀盤關鍵。睇平面圖，面積較細的「L室」，無論廚房、客房、以至客飯廳，原來都比「K室」闊落，幾乎每個地方大一兩呎。

唯一分別是主人房，「K室」主人房較「L室」寬敞約十呎左右，所以純兩房間隔，準買家如何揀，主要看買家對空間分布的喜好。

共分兩期的「凱匯」，首期有1,025個單位，都有提供兩柱一房，分布二座「C室」及「D室」，面積452至460呎，首批單位有推出，但揀樓時卻要小心。

皆因比較平面圖，面積略大的「D室」，原來跟面積略細的「C室」，內櫳各個空間分布並沒有任何分別。由長型客飯廳、以及睡房的面積，兩個單位都均等，分別是181呎及80呎，以至廚厠露台、工作平台也一樣。

所以有意主攻一房細位的買家，應該「揀C不揀D」，因為「D室」多出的八呎，僅反映在用不到的牆身上。