【財經八一八】莊偉忠重出江湖

將一田搞得有聲有色，由一間百貨變成三間百貨加四間超市的莊偉忠，憑着「不開會」的管理策略一舉成名。莊偉忠早前突然宣布掛靴，辭任一田ＣＥＯ，提早退休陪老婆，可謂震驚市場。不過，他就如漆黑中的螢火蟲一樣，即使話要退休，亦仍然成為搶手貨。

休息了僅僅三個月，莊偉忠終於忍不住要重出江湖，宣布擔任康宏金融（01019）行政總裁。康宏內部每個季度都會舉行大型內部會議，週一於九展開會，超過一千名員工出席。聽到莊偉忠任新ＣＥＯ這個好消息，員工反應非常熱烈，開心程度猶如見到韓星在台上表演一樣，康宏股價亦因此單日彈升百分之四。莊偉忠暫時未為公司定下新目標，至於未來是否不用再開會，就要拭目以待。

莊偉忠本身亦是出身金融界，早年曾在大通銀行任職，其後與朋友創辦財務公司安信兄弟，再高價售予渣打，成為一時佳話。

其實，康宏金融主席王利民本身亦是不愛按常規辦事之人，相信與莊偉忠將會非常合拍。王利民經常與員工打成一片，去撒哈拉沙漠、北極同南極跑馬拉松，都會拉埋員工一齊做，又會同員工一齊睇世界盃，絕無架子。又多一個開明老闆，康宏員工實在非常幸福。

小精靈殺入券商

《Pokemon GO》殺入香港個多星期，熱潮未退之際，更愈來愈瘋狂。不少生意人就乘機借小精靈開拓商機，商場或食肆大撒「櫻花」，以增加該地點的小精靈數目，自然亦吸引到大批「訓練員」湧到。

想不到，這股小精靈抽水潮，亦吹到證券行。寶盛證券近日公布，推出精靈訓練員優惠，凡年滿十八歲，只要成功捕獲「比卡超」及「小火龍」，帶到寶盛開戶，並存入一萬元，即送iTunes或Google Play禮品卡，價值200元。

寶盛證券發言人話，公司一向主打年輕人市場，為了吸引更多後生仔開戶，所以就想到出小精靈這一招。至於為何要捉「比卡超」及「小火龍」，原因好簡單，因為「比卡超」具有代表性，而該公司位於炮台山，附近特別多「小火龍」，所以在附近捉完就可以順手上去開戶。

又一隻明星股上市

內地藝人近年積極進軍金融界，投資非常有道，的確羨慕死老戴。其中一個做戲同投資都一樣出色的，是美女李冰冰。大陸新三板將出現互聯網服飾第一股，網店「韓都衣舍」宣布，正式獲得新三板上市掛牌函。該公司背後投資者星光熠熠，甚有明星效應。

韓都衣舍首批投資者之一，包括由黃曉明、李冰冰和任泉三人成立的Star VC，當時三人分別實繳五百萬、五百萬及三百萬人民幣，到去年，李冰冰及黃曉明的投資已升值到近一千四百萬人幣，稍後時間韓都衣舍掛牌，相信兩人身家又會再漲一大截。

其實，李冰冰及黃曉明早已透過Star VC賺箇盤滿砵滿。Star VC一四年創立，投資眼光非常精準，包括秒拍、融360等，個個都是大項目。連名導演馮小剛之前亦大爆李冰冰投資從來無蝕過。除了本身三位明星之外，投資公司當然希望引入更多明星合夥人，去年十月章子怡及黃渤亦已加入Star VC。內地明星投資如此精明，香港藝人真的要借鏡一下。

中資老闆三招增訪港效率

中資老闆經常來港開記招，公關友人就話，原來佢哋唔多鍾意。老戴奇怪，香港食好住好，中資老闆因何嫌棄？難道唔想面對香港傳媒？唔想舟車勞頓？答案通通非也，原因同經常返回內地傾／做生意之香港人一樣——內地航班誤點，只是個多小時的機程，往往一等就是幾個鐘頭，如果是上海等繁忙城市，分分鐘早上到機場，夜晚才可以抵達目的地。

公關友人仲話，以前紅籌國企老闆通常一年來港兩次開記者會，一次中期，一次全年，希望同新聞界朋友會晤一下，但近年就只是全年業績公布的時候才來一次，有時甚至一次都唔來。

否則，為了增加效益，如果老闆來香港，好多時都會要求公關搞埋路演，見埋機構投資者，甚至去埋新加坡，咁至可以抵返誤點等咁耐條數咁話。